اسلام آباد، خیبر پختونخوا، پوٹھوہار و کشمیراٹی جشوک آ پِر انا گمان ءِ، محکمہ موسمیات

اسلام آباد ۔ 05مارچ(اے پی پی) محکمہ موسمیات جمعہ و ہفتہ نا دے آ اسلام آباد، خیبر پختونخوا ، پوٹھوہار و کشمیر اٹی جشوک آ پِر انا پیش گوئی کرینے ۔ جشوک آ پِر تیان ژوب، موسیٰ خیل، لورالائی ، ڈی آئی خان، بنوں ، کرک وزیرستان ، دیر مالاکنڈ، سوات، پشاور ، مردان ، ہزارہ و کشمیر نا مشی آ چُر آتیٹی سیلاب نا گڑتی ظاہر کرینے، جشوک آ پِر و پدریسہ پِر تا سوب آن کشمیر، گلگت ، مالاکنڈ، دیر و ہزارہ نا مشی آ شاہراہ تیا لینڈ سلائنڈنگ نا ہم خطرہ ءِ ۔ بھلا پِر ، ترونگڑ و ترند تہو تیان خیبر پختونخوا و بڑزکو پنجاب اٹی خولم نا فصل آتے جزوی نسخان نا گڑتی ءِ ۔ رپورٹ نا رداٹ بروک آ 24گھنٹہ ٹی خیبر پختونخوا ، اسلام آباد، پنجاب ، قطب دے ٹکی بلوچستان ،م کشمیر و گلگت بلتستان اٹی ہورہ و گروک و ترند تہو تتون پِر انا گمان ءِ ۔ بڑزکو خیبر پختونخوا ٹی گڑاس ہند آتیا جشوک آ پِر، ترونگڑ نا ہم گمان ارے ۔ بڑزکو خیبر پختونخوا و قطب دے ٹکی بلوچستان اٹی گڑاس ہند آتیا جشوک آ پِر اتون ترونگڑ نا ہم گمان ءِ ۔ جشوک و پدریسہ پِرتا سوب آن ہندی چُر آتے ٹی سیلاب نا گڑتی وخت اس کہ بڑزکو سندھ اٹی ہم لوڑی آ تہوتا چلینگ انگ تون پِر انا گمان ءِ ۔ محکمہ موسمیات نا رداٹ تدوک آ 24گھنٹہ ٹی بلوچستان، بڑزکو و سویل پنجاب، خیبر پختونخوا و کشمیر نا گڑاس ضلع و اسلام آباد اٹی ترند تہو و ہورہ و گروک تون پِر مس وخت اس کہ ملک انا ایلو علاقہ غاتے ٹی پِر کتنے ۔ داوخت آ بارکھان اٹی 34ملی میٹر، قلات2، کوٹ ادو17، ڈی جی خان 14، ملتان 12، اسلام آباد10، بھکر 8، راولپنڈی 5، لیہ 5، بہاولپور 4، اٹک ، نورپورتھل 3، فیصل آباد2، ساہیوال، مری و جوہر آباد اسہ ، پاراچنار 15، بنوں 11، کاکول ، بالاکوٹ4، چراٹ، ڈی آئی خان 2، مظفر آباد 6و گڑھی دوپٹہ ٹی 2ملی میٹر پِر ریکارڈ مس ۔ پنچ شنبے نادے آ ریکارڈ کروک آ کم آن کم درجہ حرارت نا رپورٹ نا رداٹ استور اٹی درجہ حرارت منفی 3، کالام منفی 2، گوپس و سکردو ٹی صفر ڈگری سینٹی گریڈ ریکارڈ کننگانے ۔