اسلام آباد ۔ 05مارچ(اے پی پی) اقوام متحدہ نا ہائی کمشنر باہوٹ (یو این ایچ سی آر) اوغان باہوٹ آتا رضاکارانہ وطن آ پدی ہِننگ ءِ باوقار و رکھ کننگ کن پاکستان نا مخ تفی ءِ برجاتخنگ نا اسہ وار ولدا درشانی ءِ کرینے ۔ پنچ شنبے نادے آ نجی ٹی وی چینل تون گپ وتران اٹی (یو این ایچ سی آر) نا ترجمان قیصر آفریدی کم و ود 4دہائی آن اوغان باہوٹ آتا مہمانداری ءِ کننگ آ پاکستان نا الس و حکومت نا ستاءِ کرے ۔ اوپارے کہ نن جہانی برادری ءِ ہم پانہ کہ او دا بابت آن پاکستان نا کمک ءِ برجاتخے ۔ اوپارے کہ اوغان باہوٹ آتا وطن آ پدی ہِننگ نا عمل نومبر اسکان برجاسلک و داٹی آسراتی فراوان کننگ کن (یو این ایچ سی آر) صوبہ خیبر پختونخوا ٹی اسہ اسہ رضاکارانہ وطن آ پدی ہِننگ نا ہند اس جوڑ کرینے ۔ قیصر آفریدی پارے کہ اضاخیل اٹی جوڑ ہند اٹی ہردے 10 ہزار اوغان باہوٹ آتے طورخم بارڈر نا کمک اٹ وطن آ پدی ہِننگ نا آسراتی دوبریک ۔ اوپارے کہ پاکستانی حکومت کوءٹہ و نوشہرہ ٹی اِرا ہند جوڑ کرینے تانکہ دا عمل ءِ آسان کننگ مرے ۔ اوپارے کہ اوغان امن معاہدہ مچ آ ڈیہہ کن بے کچ اہم ءِ ۔
