اسلام آباد ۔ 05مارچ(اے پی پی) فیڈرل بورڈ آف ریونیو(ایف بی آر) پارینے کہ خراج سال 2019ء کن 28 فروری 2020ء اسکان 24لکھ 72ہزار 609 خراج گوشوارہ جمع مس ہرا تدوک آ سال انا مقابلہ ٹی 45درسد زیات ءُ ۔ ایف بی آر نا ترجمان پنچ شنبے نادے آ پارے کہ خراج سال 2018ء نا رداٹ ایف بی آر ءِ 16لکھ 95 ہزار 560 خراج گوشوارہ دوئی مسوسس ۔ خراج سال 2019ء کن 28 فروری 2020ء ایف بی آر ءِ کل 24لکھ 72ہزار 609 خراج گوشوارہ ملا، دا شرح تدوک آ خراج سال انا مقابلہ ٹی 45درسد زیات ءُ ۔ اوپارے کہ تدوک آ سال گوشوارہ جمع کرفنگ نا تاریخ اٹی ودکی کرسا ہِننگا و 9 اگست حتمی تاریخ ئس ۔ اخباری خبر تا بابت آن وضاحت کرسا ترجمان پارے کہ ہندا خبر آتے ٹی خراج سال 2018ء نا حتمی تاریخ ہرا 9 اگست ئس نا موازنہ خراج سال 2019ء آن کننگانے ہرا راست اف ۔ خراج سال 2019ء کن گوشوارہ جمع کرفنگ نا آخیریکو تاریخ 28 فروری 2020ء ئس ۔ اوپارے کہ ہندا خبر آتے ٹی کم خراج گوشوارہ جمع کرفنگ نا بابت حساب وکتاب درست اف ۔ خراج سال 2018ء نا حتمی تاریخ آن ہلیس خراج سال 2019ء نا حتمی تاریخ اسکان کل وخت 6تُو مریک ہراکہ تدوک آ خراج سال انا مقابلہ ٹی کم وخت ءِ ولے اوکان پد ہم شش تُو انا وخت اٹی 24لکھ آن زیات گوشوارہ غاتا دوئی کننگ بھاز بھلو سرسہبی اسے ۔ ترجمان پیدوار کرے کہ ایکٹوٹیکس پیئر لسٹ آ بننگ کن شاری تا کنڈآن گوشوارہ جمع کرفنگ نا چرجوئی برجاسلک، ولے حتمی تاریخ آن پد گوشوارہ جرمانہ نا زرتس آن پد ہی جمع کرفنگ مریک ۔