اسلام آباد ۔ 05مارچ(اے پی پی) بنجائی وزیر اقتصادی امور حماد اظہر پارینے کہ پاک ۔ چین اقتصادی راہداری ڈٹ پوسکن آ مرحلہ ٹی پترینگانے و گرج دا ہیت انا ءِ کہ نیو گوادر انٹرنیشنل بالی پٹ، گوادر ووکیشنل ٹریننگ سینٹر و گوادر ہسپتال کون آ گرانٹ نا بنداو آ سلاہ ئی ڈٹ آتے پورو کننگ نا کاریم اٹ ترند ی اتنگے ۔ داخیال آتا درشانی ءِ او پاکستان اٹی چین نا سفیر یاءوجنگ و چین نا کمرشل و اقتصادی قونصلر ژوسانگ سنگ تون اوڑدہی ٹی گپ و تران کرسا کرے ۔ چینی سفیر پاکستان و چین نا نیام اٹ وسیع البنیاد سیاسی، راجی، دودوربیدگ، زرگزرانی و ادارہ جاتی تعلقداری نا اہمیت ءِ تالان کرسا پارے کہ ہڑتوم آ ملک آتا نیام اٹ تعلقداری، کمکاری ، سنگتی و شریداری ءِ بھاز السی مخ تفی دوئی ءِ ۔ اقتصادی امور نا بنجائی وزیر حماد اظہر پارے کہ سی پیک پوسکن آ مرحلہ ٹی پترینگانے، پاکستان السی جمہوریہ چین نا کمک اٹ بنداوی پنجر ءِ شون تسنے، سی پیک نا زوت پورو و بھرم تروک آ (ارلی ہارویسٹ) ڈٹ خاص وڑاٹ موٹرویز و توانائی نا ڈٹ پوروی نا خڑک ءُ، نیو گوادر انٹرنیشنل بالی پٹ ، گوادر ووکیشنل ٹریننگ سینٹر و گوادر ہسپتال کون آ گرانٹ نا بنداو آ سلاہ ئی ڈٹ آتے پورو کننگ نا کاریم اٹ ترندی اتنگ نا گرج ءِ ۔ اوپارے کہ سی پیک نا جاری مرحلہ کن بنداوی پنجر و توانائی نا ڈٹ آتیا امنا کننگاسس، بروک آ مرحلہ ٹی راجی و اقتصادی شونداری و نجی کاروبار خاص وڑاٹ خصوصی اقتصادی زون تیٹی برآمد آتیا مبنی صنعت آتا مون آ دننگ آ چکار کننگ انگ ءِ ۔ بنجائی وزیر ملک انا سویلی علاقہ غاتے ٹی ملخ آتا مون ءِ توننگ اٹ چین نا کمکاری نا منت واری ءِ ہرفے ۔ چینی چاہندار آتا ٹیم پاکستان اٹی ملخ آتا مون ءِ توننگ کن پاکستان نا کمامدارآتون اواری اٹ کاریم کننگ ءُ ۔ داوخت آ حکومت پاکستان و چین نا نیام اٹ ڈیزاسٹر مینجمنٹ ازباب آتا فراوانی نا معاہدہ آ دستخط ہم کننگا ۔ دا ازباب آتے چینی حکومت نا گرانٹ آن نیشنل ڈیزاسٹر مینجمنٹ اتھارٹی (این ڈی ایم اے) ءِ فراوان کننگانے ۔ اوڑدہی ٹی ہڑتوم آ کڑدہ غاک خڑک انا کاریم ءِ برجاتخنگ و اقتصادی تعلقداری تے پین مون آدننگ آ امنا کریر ۔ اوڑدہی ٹی فیصلہ کننگاکہ ہڑتوم آ ملک آتا اسیجا اقتصادی کمیشن نا دیوان اینخوسال اٹی اڈ ہلیک ہراٹی ہڑتوم آ ملک آتا نیام اٹ چندی بشخ آتے ٹی تعلقداری و کمکاری ءِ مون آ دننگ کن گام گیج آتا جاچ ءِ ہلنگک ۔ حماد اظہر اومیت ظاہر کرے کہ ساڑی حکومت کاروبار اٹی آسانی و پیشن نا زرکارآتے کن ہراترغیب آتے تسونے چین نا زرکارآک داڑآن پبی وڑاٹ فائدہ ہرفرہ ۔ چین نا سفیر و کمرشل قونصلر دا وخت آ پاکستان تون اقتصادی و واپاری تعلقداری تے پین ودفنگ نا عزم انا درشانی ءِ کریر ۔
