اسلام آباد ۔ 05مارچ(اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ کورونا وائرس آن بچنگ کن بنجا، صوبہ غاک و غٹ ادارہ غاک پورو تیار ءُ، غٹ ڈغاری کسر و بالی پٹ آتیا سکریننگ کننگ انگ ءِ ، غٹ ءِ اواری اٹ الس ءِ رکھ فراوان کننگ کن پبی گام گیج کروئی مریک، داوخت اسکان 7لکھ60 ہزار آن زیات مسافر آتا سکریننگ ءِ کننگانے، کورونا وائرس تون مون تننگ کن ہر وڑاٹ گام گیج آتے پک کننگ انگ ءِ ۔ پنچ شنبے نادے آ ڈاکٹر ظفر مرزا نا کماشی ٹی ایمرجنسی کور پڑک نا دیوان اس مس ہراٹی بنجائی سیکرٹری ہیلتھ ڈاکٹر سید توقیر حسین شاہ ، ایگزیکٹو ڈائریکٹر این آئی ایچ، پاک فوج انا نمائندہ و ایلو چاہندارآک اوار ئسر ۔ دیوان اٹی ساڑی حالیت آتے ٹی ملک اٹی کرونا وائرس آن بچنگ کن کروک آ گام گیج آتا جاچ ءِ ہلنگا ۔ داوخت آ ڈاکٹر ظفر مرزا پارے کہ کورونا وائرس آن بچنگ کن بنجا، صوبہ و غٹ ادارہ غاک پورو تیار ءُ ۔ اوپارے کہ ننے غٹ ءِ اواری اٹ الس ءِ رکھ فراوان کننگ کن پبی کڑد ادا کروئی مریک ۔ ڈاکٹر ظفرمرزا پارے کہ غٹ ڈغاری کسر و بالی پٹ آتیا سکریننگ کننگ انگ ءِ ، تدوک آ دے 21ہزار 360 مسافر آتا سکریننگ ءِ کننگا وخت اس کہ داوخت اسکان 7 لکھ 60 ہزار آن زیات مسافر آتا سکریننگ مس ۔ ڈاکٹر ظفر مرزا پارے کہ کورونا وائرس تون مون تننگ کن ہروڑاٹ گام گیج آتے پک کننگ اُن، دا بابت آن ہسپتال آتے ٹی جتا ءُ کمرہ ہلانن ۔ اوپارے کہ داوخت اسکان ملک اٹی بیرہ 5کیس رپورٹ مسنو ۔ داوخت آ وزارت جان جوڑی نا کنڈآن پاننگاکہ ہر اسٹ ءِ ماسک خلنگ نا ضرورت اف ، منہ بندغ ماسک بینر ہرافتے ٹی کرونا وائرس نا ناجوڑی نا گواچی بندغ و ڈاکٹرز و جان جوڑی نا عملہ ہراکہ کرونا وائرس نا مریض آتا خیال داری ءِ کیرہ یا سخت جکہ نزلہ و زکام نا گواچی بندغ آک ماسک بینر ۔
