کوئٹہ۔ 04مارچ(اے پی پی) وزیراعلیٰ بلوچستان جام کمال خان پارینے کہ پاکستان اسلام نا پن آ جوڑ مسنے و اسلام ہمو قوت ءِ ہراملک ءِ تورینے، پاکستان و اونا ادارہ غاک بھاز شیف بڑزی خنانو، ادارہ غاتے جوڑ کننگ کن ڈٹ بندی، بنداوی پنجر و انسانی وسیلہ غاتا شونداری آ زرکاری کننگ نا گرج ءِ۔ ہرا تدوک آ سی سال اٹ کننگتنے۔ داخیال آتا درشانی ءِ او کوئٹہ انٹرنیشنل بالی پٹ انا رن وے انا تعمیر نو نا ڈٹ انا بنداو ءِ تخنگ و بالی پٹ نا انٹرنیشنل لاؤنج نا بنائی دود آن تران کرسا کرے۔ بنجائی وزیر ہوابازی غلام سرور خان، پارلیمانی سیکرٹری ہوابازی کیپٹن ریٹائرڈ جمیل احمد، صوبائی وزراء، و باسک صوبائی اسمبلی و سینیٹر منظور احمد کاکڑ ئسک ہم دود اٹی ساڑی ئسر۔ وزیراعلیٰ پارے کہ ہراتم اُرا، راج، ملک و ادارہ غاتے ٹی انصاف و بریبری نا خواست آتے پورو کننگک تو او سوگو مریرہ ولے اگہ حالیت آک داکان چپ مریر تو او تباہ مریرہ، اوپارے کہ پی آئی اے و پاکستان ایئر فورس ایلو ملک آتا پائلٹ آتے بال تننگ ہیل تسر و اوفتا ادارہ جوڑ کریر، ننا ڈاکٹر، انجینئر و بینکنگ سیکٹر دنیا نا ایلو ملک آتا شونداری ٹی بشخ شاغار، ولدا ننا ادارہ غاک نزوری خنار ہرا ادارہ غاتے تباہی نا کنڈآ دریرہ، ننا ٹیکنیکل ادارہ غاک مشکل ءُ وخت خنار ونن اسہ کہول اسے آ بسن سلیسن، وزیراعلیٰ پارے کہ اسہ ادارہ اسے ہم و کاروبار اسے زیات وخت اسکان نسخان آ چلیفنگ مفک ولے اگہ ادارہ غاتے سوگو کننگ نا نیت واحساس مرے تو گچینی بریک، پی آئی اے، سول ایوی ایشن و ایلو قومی ادارہ غاک گچینی نا کنڈآ ہِننگ ءُ ہراڑآن اسہ وار ولدا پی آئی اے بش مریک۔ اوپارے کہ داسہ راج و خلقت آ زرکاری کننگ نا گرج ءِ، نن تینا پوسکن آ چین ءِ ہر لحاظ اٹ تعلیمی و تکنیکی آسراتی تیان لیس کننگ ءِ ہراادارہ غاتے گچین کننگ نا لائخی دوئی کننگ کیر، وزیراعلیٰ پارے کہ ڈٹ بندی کننگ آسان ولے اوڑآ عملدرآمد کننگ مشکل مریک۔ مستین نا غلط ڈٹ بندی آن وسیلہ غاتا زیان مس، اوپارے کہ ساڑی صوبائی کابینہ2001ء آن بے پورو اسکیم تے پوو کننگ نا بھلو فیصلہ اس کرینے ہرا غلط ڈٹ بندی و وسیلہ غاتا زیان نا سوب بھلو وخت اسے آن تعطل نا گواچی ئسر، وزیراعلیٰ پارے کہ نن السی اسکیم تا اونر شپ ہلکونن ہرانا کریڈٹ غٹ حکومتی جماعت آتے کاہک۔ بلوچستان نا وسیلہ غاتا بابت وزیراعلیٰ پارے کہ صوبہ معدنی وسیلہ، توانائی نا گیگ بدل ذرائع، تیل و گیس، سیل و سوات، ماہی گیری، کشت وکشار و مالداری کون آ بشخ آتے ٹی شونداری نا بے پناہ گنجائشت تخک، بلوچستان نا وسیلہ ہمو وخت آ کاریم بریرہ ہراتم ملک و پیشن نا زرکار آک دانگیا بریرہ، وسیلہ تخوک علاقہ غاتسکان اوفتا رسینگ مریک۔ اوپارے کہ طالبان و امریکہ نا نیام اٹ مروک آ امن معاہدہ نا ڈیہہ غا دوررس بھرم تمک، تاپی گیس ڈٹ پورو مریک و نیامی ایشیاء اسکان قلیل ترین روٹ ہرات، ہلمند، قندھار و کوئٹہ شاہراہ جوڑ مریک ہرا سہی وڑاٹ اسہ واپاری روٹ اس مریک، اوکان پد وزیراعلیٰ و بنجائی وزیر ایئرپورٹ نا دنگ اٹ نیال اس ہم خلکر۔
