اسلام آباد۔ 04مارچ(اے پی پی) وزیر خارجہ شاہ محمود قریشی پارینے کہ پاکستان اٹی پولیو نا پورو چٹفنگ حکومت نا اولیت آتے ٹی اوار ءِ، حکومت کرونا وائرس نا تالان مننگ ءِ توننگ کن غٹ المی گام گیج آتے کننگ ءِ۔ داہیت ءِ او جہانی ادارہ جان جوڑی نا نمائندہ پاکستان ڈاکٹر پلیتھا تون گپ و تران کرسا پارے ہرافک چارشنبے نادے آ وزارت خارجہ ٹی اوڑتون اوڑدہی کریر۔ داکان مست ڈاکٹر پلیتھا وزیر خارجہ ءِ تینا سفارتی سند آتے پیش کرے۔ ڈبلیو ایچ او نا نمائندہ پارے کہ جہانی ادارہ جان جوڑی پولیو نا چٹفنگ نا چرجوئی ٹی حکومت پاکستان تون تینا کمکاری ٹی پین ودکی کرینے۔ وزیر خارجہ پارے کہ پاکستان اٹی پولیو نا پورو چٹفنگ حکومت نا اولیت آتے ٹی اوار ءِ۔ حکومت پاکستان کرونا وائرس نا تالانی ءِ توننگ کن غٹ المی گام گیج کننگ ءِ۔ دا چرجوئی ٹی بالی پٹ آتیا تھرمل سکینر و ہمسایہ ملک آتون سیمی پوائنٹ آتیا قرنطینہ آسراتی جوڑ کننگ انگ ءِ۔ وزیر خارجہ پاکستان اٹی کمکار ٹیکنالوجی جان جوڑی اسکان رسینگ اٹ گچینی نا چرجوئی ٹی حکومتی گام گیج آتیان ہم معلومدار کرے۔
