اسلام آباد۔ 04مارچ(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ اسلامی کمکار تنظیم (او آئی سی) نا سیکرٹری جنرل نا خصوصی نمائندہ نا بھارت نا کوزہ ٹی جموں و کشمیر نا مظلوم الس نا حق اٹی بیان ستاکڑزک، اقوام متحدہ نا سلامتی کونسل نا قرارداد آتا رداٹ تنازعہ کشمیر نا ایسری و اوآئی سی نا قرارداد آتیا عملدرآمد نا خواست انا خیر مقدم ءِ کینہ، اسلامی ملک آتا نمائندہ تنظیم نا مقبوضہ جموں و کشمیر نا الس تون یکجہتی نا درشانی ہمو مظلوم آتے کن است بڈی انا سوب ءِ۔ چارشنبے نادے آ خصوصی کمکار ڈاکٹر فردوس عاشق اعوان تینا ٹویٹ اٹی پارے کہ او آئی سی نا کشمیر نا ویل آ کشمیری و پاکستان نا اصولی موقف نا بدل مفروک مخ تفی ستاکڑزک۔ دا امت مسلمہ نا کشمیری تیکن احساس ءِ و بھارتی انسانیت سوز ظلم انا ہم اعتراف ءِ، دا اہم و سنجیدہ انسانی ویل آ او آئی سی نا دیوان ءِ بٹنگ مظلوم کشمیری تا حوصلہ غاتے پین بڑز و اوفتا توار ءِ پین قوت ایتک۔ ڈاکٹر فردوس عاشق اعوان پارے کہ مقبوضہ جموں و کشمیر اٹی انسانی حق آتے لتاڑنگ انگ ءِ، مچ آ دامان جیل انا منظر پیش کننگ ءِ، اسلامی دنیا اقوام متحدہ نا قراردادآتے مون آ تخسا کشمیری تا روا، جمہوری و کانودی حق ءِ ترفنگ اٹ عملی کڑد ادا کے۔ اوپارے کہ او آئی سی نا بے کچ اہم ڈل انا آزاد جموں کشمیر ولائن آف کنٹرول نا دورہ غان بھارتی ڈوہ دنیا نا مون آ بریک۔ مچ آ دنیا غا داہم ثابت مسنے کہ بھارت پدریسہ دروغ تڑنگ ءِ و انسانیت نا برخلاف تینا ڈوہ و جہانی ضابطہ غاتا پاش آن پاش خلاف ورزی آ پڑدہ شاغنگ نا کوشست کننگ ءِ، بھارت دا ڈوہ تیٹی اوار متوکہ تو او آئی سی تون اوار مچ آ دنیا ءِ مقبوضہ جموں و کشمیر آ ہِننگ نا موکل تسکہ۔
