اسلام آباد۔ 04مارچ(اے پی پی) بنجائی وزیر ڈٹ بندی اسد عمر پارینے کہ پاکستان نا شونداری ٹی پوسکن آ ٹیکنالوجی نا اہم ءُ کڑد اس مریک، دنیا نا اولیکو یونیورسٹی اسلامی دنیا ٹی جوڑ مس، اسلام نا کلہو ”اقراء“ ءِ۔ جامعہ غاتے ٹی ریسرچ نا وت پاکستان نا ویل آتا ایسر بایدے مرے، انجینئرنگ یونیورسٹی تا کاریم نا کچ ءِ ودفنگ نا گرج ءِ۔ داخیال آتا درشانی ءِ او نسٹ یونیورسٹی ٹی نالج اکانومی سیمینار آن تران کرسا کرے۔ داوخت آ چیئرمین ٹاسک فورس نالج اکانومی ڈاکٹر عطاء الرحمان آن بیدس وزیراعظم نا خصوصی کمکار ڈیجیٹل پاکستان تانیہ ایدریس ہم ساڑی ئس۔ بنجائی وزیر اسد عمر پارے کہ پاکستان نا شونداری ٹی پوسکن آ ٹیکنالوجی نا اہم ءُ کڑد اس مریک۔ دنیا نا اولیکو یونیورسٹی اسلامی دنیا ٹی جوڑ مس، اسلام نا کلہو ہی ”اقراء“ ءِ۔ اوپارے کہ تعلیمی ادارہ غاتے پین زوال پذیر مننگ کن الیپنہ۔ پاکستان نا آخبت اٹی زرکاری کننگ اُن۔ اسد عمر پارے کہ تحریک انصاف نا حکومت بڑزکو تعلیمی شونداری بجٹ اٹ دوگنا ودکی کرے، ننا دور اٹی تعلیم نا شونداری بجٹ 21 ارب آن 29ارب اسکان ودفنگا، تعلیمی شونداری بجٹ اٹی تحریک انصاف ریکارڈ ودکی کرے۔ اوپارے کہ تعلیمی پی ایس ڈی پی ٹی تحریک انصاف نا اولیکو سال اٹی 14درسد ودکی کننگا، شونداری بجٹ ءِ کم کننگ نا غلط تاثر تالان کننگا۔
