اسلام آباد۔ 03مارچ(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ الس ءِ ریلیف فراوان کننگ حکومت نا اولیت ءِ، وزیراعظم الس ءِ اڑزان بہا آ المی آ گڑاتا فراوانی ءِ پک کننگ نا پارت کرینے۔ سے شنبے نادے آ کابینہ نا دیوان آن پد میڈیا ءِ حوال ترسا ڈاکٹر فردوس عاشق اعوان پارے کہ کابینہ نا دیوان اٹی بنجائی وزیر ڈٹ بندی اسد عمر ادار ہ شماریات نا ٹک آتیان معلومدار کرے۔ اوپارے کہ الس ءِ ریلیف فراوان کننگ حکومت نا اولیت ءِ، حکومتی گام گیج آتا سوب آن زرگزرانی ٹک آتے ٹی گچینی بسنے۔ اوپارے کہ کابینہ نا دیوان اٹی وزیراعظم زرگزرانی ٹیم انا کارکڑدگی نا ستاءِ کرے۔ ڈاکٹر فردوس عاشق اعوان پارے کہ دیوان اٹی وزیراعظم پارت کرینے کہ کوڑی کروک و ملاوٹ مافیا نا برخلاف صوبائی حکومت آک کارروائی کیر۔ اوالس ءِ اڑزان بہا آالمی آ گڑاتا فراوانی ءِ پک کننگ نا ہم پارت کرے۔ اوپارے کہ حکومتی اصلاحات آن ادارہ غاک سوگو مننگ ءُ۔ وزیراعظم نا الس پالیسیک الس نا زند اٹی گچینی اتنگ ءُ۔ اوپارے کہ وزیراعظم لائن لاسز ءِ کم کننگ نا گرج آ ہم زور شاغا، وزیر توانائی کابینہ ءِ بجلی نا بشخ آن تعلقدار ویل آتیان معلومدار کرے۔ کابینہ ءِ بجلی نا ودکی بل، بجلی دُزی، لائن لاسز و گردشی وام تا بارواٹی پاننگا۔
