وزیراعظم نا خصوصی کمکار جان جوڑی ڈاکٹر ظفر مرزا نا کوروناوائرس آن بچنگ کن ایمرجنسی کور پڑک نا دیوان آن تران
اسلام آباد۔ 03مارچ(اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ ملک اٹی داوخت اسکان کورونا وائرس نا 5کیس رجسٹرڈ مسنو، ایمرجنسی کور پڑک حالیت آتیا مانیٹرنگ ءِ کننگ ءِ، غٹ المی گام گیج آتے ہلہلہ ئی وڑاٹ پک کننگ انگ ءِ، کورونا وائرس تون مون تننگ کن غٹ تعلقدار ادارہ و صوبہ غاتے پبی کڑد ادا کروئی مریک۔ حالیت آتیا سخت نظر تخانن خوفزدہ مننگ نا ضرورت اف، الس نا رکھ اکن ہلہلہ ئی بندا وتیا کاریم کننگ اُن۔ داخیال آتا درشانی ءِ او کورونا وائرس آن بچنگ کن ایمرجنسی کور پڑک نا دیوان نا کماشی ءِ کرسا کرے۔ دیوان اٹی ایگزیکٹو ڈائریکٹر قومی ادارہ جان جوڑی، پاک فوج انا نمائندہ و ایلو چاہندارآک ہم بشخ ہلکر و بدلینگوک آ حالیت آتا سرجم جاچ ءِ ہلکر۔ ڈاکٹر ظفر مرزا پارے کہ ایمر جنسی کور پڑک حالیت آتا مانیٹرنگ ءِ کننگ ءِ، غٹ المی گام گیج آتے ہلہلہ ئی وڑاٹ پک کننگ اُن، کورونا وائرس تون مون تننگ کن غٹ تعلقدار ادارہ و صوبہ غاتے پبی کڑد ادا کروئی مریک۔ اوپارے کہ حالیت آتیا سخت نظر تخانن خوفزدہ مننگ نا ضرورت اف، الس نا رکھ اکن ہلہلہ ئی بنداو تیا کاریم کننگ اُن۔ خصوصی کمکار جان جوڑی پارے کہ الس جان جوڑی نا اصول آتے مون آ تخسا پاریزی اختیار کیر، ملک اٹی داوخت اسکان بیرہ پنچ کیس رپورٹ مسنو۔ ڈاکٹر ظفر مرزا پارے کہ چمن نا ہند آ پاک او غان بارڈر ہفت دے اکن بند ءِ، چمن بارڈرآ سکریننگ نا نظام ءِ پین گچین و سوگو کننگ انگ ءِ۔ اوپارے کہ غٹ بالی پٹ و ڈغاری کسر تیا سکریننگ کننگ انگ ءِ۔
