اسلام آباد۔ 03مارچ(اے پی پی) بنجائی وزیر اقتصادی امور حماد اظہر پارینے کہ حکومتی گام گیج آتے ٹی کبینی نا کچ اٹی کمتی و برآمد آتے ٹی ودکی مننگ ءِ۔ تدوک آ دے تینا ٹویٹ اٹی اوپارے کہ حکومت زرگزران نا گچینی و افراط زر نا کچ انا مون ءِ توننگ کن ہراگام گیج آتے کرینے اوفتا بھرم مون آ بننگ ءِ۔ اوپارے کہ فروری ٹی المی آ کنوئی آ گڑاتا نہاد آتے ٹی نمان کمتی بسنے، جنوری نا مقابلہ ٹی فروری ٹی پیماز نا نہاد اٹی 8.8درسد، ٹماٹر60.3درسد، پٹاٹہ 12.9درسد، تازہ سوزی 11.5 درسد، و نت انا نہاد آتے ٹی 5.3 درسد نا نمان کمتی بسنے۔ غیر غذائی گڑاتے ٹی ایل پی جی و بجلی نا نہادا ٹی 13.5 درسد نا کمتی بس۔ اوپارے کہ لس بندغ کن نہاد آتا حساس اشاریہ 14.6 درسد آن تمسا 12.4 درسد مسنے۔ بنجائی وزیر پارے کہ فروری نا تُو اٹی برآمد آتے ٹی 13.6 درسد ودکی وخت اس کہ درآمد آتے ٹی 4 درسد کمتی ریکارڈ کننگا۔ داکہ پاکستان نا برآمد آتے ٹی اسہ ہندن ءُ وخت اسے آ ودکی مننگ ءِ ہراکہ ڈیہہ ایلو ملک آتے ٹی برآمد آتے ٹی منفی گروتھ خننگ انگ ءِ۔
