ہری پور۔ 03مارچ (اے پی پی) بنجائی وزیر توانائی عمر ایوب خان علاقہ پہاڑ خانپور نا بجلی ءِ اسلام آباد تون گنڈنگ نا ڈٹ انا بناءِ کرے۔ دا علاقہ غان اسہ وزیراعظم اس و مسہ قومی اسمبلی نا باسک گچین مسر ولے اسٹ اس ہم الس نا کاریم تے کتو، علاقہ پہاڑ نا کونہ کونہ ٹی بجلی ءِ نن سرکرین، داسہ بور و گلی نا اسہ ٹکر اس ترسا الس ءِ ریفنگ نا سیاست چلینگپک، ترین خاہوت ضلع ہری پور ءِ جوڑ جاڑ و شونداری نا کنڈآ درینو، ارب آ روپئی نا شونداری ڈٹ آک ننا کارکڑدگی نا شاہدی ءُ۔ داخیال آتا درشانی ءِ بنجائی وزیر توانائی عمر ایوب خان مسلم آباد اٹی مسکوہی باسک تحصیل کونسل حاجی نزاکت نا کنڈآن السی جلسہ غان تران اٹی کرے۔ جلسہ غان چیئرمین ڈیڈک ارشد ایوب خان، راہشون تحریک انصاف یوسف ایوب خان، حاجی نزاکت و ایلوفک ہم تران کریر۔ داوخت آ پی ڈی کنسٹرکشن آئیسکو دلاور شاہ، راجہ اسد حبیب، راجہ ذوالفقار، چیئرمین ارشاد، چوہدری عبدالحمید اس تیان بیدس سیاسی و راجی شخصیت آتیان بیدس الس نا بھلو کچ اس ساڑی ئسر۔ داکان مست خان برادر ہراتم آ مسلم آباد آ سرمس تو مسکوہی باسک تحصیل کونسل حاجی نزاکت الس نا جم غفیر آتون اوار اودے بخیر کرے۔ جلسہ غان تران کرسا بنجائی وزیر توانائی عمر ایوب خان پارے کہ مہالو دا علاقہ ایبٹ آباد تون گنڈوک ئس و داکان اسہ وزیراعظم اس اِرا وار گچین مس ولے علاقہ نا الس ءِ وونٹ انا بدلہ محرومی ملا، نن شونداری کاریم تیان ہری پور نا تقدیر ءِ بدل کننگ والا اُن، ترین خاہوت ہری پور اٹی کاریم کرسا اونا نقشہ ءِ بدل کرینے، اخس کہ شونداری کاریم دا ضلع ٹی مسنے ہنداخہ صوبہ نا اسہ ضلع سے ٹی متنے، شونداری کاریم تا سوب آن ننا ضلع غٹ آن مون آٹے۔
