اسلام آباد۔ 03مارچ(اے پی پی) نیشنل ڈیزاسٹر مینجمنٹ اتھارٹی (این ڈی ایم اے) چین، ایران و کورونا وائرس آن زہمی ایلو ملک آتیان پاکستان آ بروک آ مسافر آتے کن اسلام آبادا ٹی300 کٹ آتیا تالان پوسکن ءُ کیورنٹائن سینٹر اس جوڑ کرینے۔ ترجمان این ڈی ایم اے نا رداٹ چین، ایران و کروناوائرس نا زہمی ایلو ملک آتیان پاکستان آ بروک آ مسافر آتے 15دے اکن دا عارضی قیام گاہ ٹی تخنگک۔ دا عارضی قیام گاہ، ڈسپنسری، کیفے ٹیریا و ایلو تفریحی آسراتی تے چار دیوالی نا تہہ ٹی فراوان کننگانے۔ ترجمان نا رداٹ مچ آ دنیا ٹی کرونا وائرس نا سوب ودی مروک آ ایمرجنسی نا رداٹ قرنطینہ سینٹر نا جوڑ کننگ ءِ ہلہلہ ئی بنداو تیا اسہ ہفتہ ٹی پورو کننگانے۔ دا سینٹر نا جوڑ کننگ کرونا وائرس آن ودی مروک آ ہلہلہ ئی حالیت آتون مون تننگ کن رکھی گام تا رداٹ کننگانے۔ داکان بیدس این ڈی ایم اے 20 ملین روپئی نا خڑچ آن کرونا وائرس نا مریض آتا درستی راستی کروک آ مسہ پوسکن ءُ سکینر ہم دوئی کرینے ہرا فتے چندی بالی پٹ آتیا خلنگانے۔
