اسلام آباد۔ 02مارچ (اے پی پی) وزیراعظم عمران خان پارینے کہ کم کٹیا کروک تپہ غاتا بنداوی گرج آتا خیال ءِ تخنگ ریاست نا زمواری ءِ ہرا دے ساڑی حکومت ہرفینے، پناہ گاہ و لنگر خانہ غاتا جوڑ کننگ حکومت نا کنڈآن نزور تپہ نا کمکاری نا عزم انا عملی درشانی ءِ دا چرجوئی ٹی نجی بشخ ومخیر خواجہ غاتا حکومت تون شریداری ستاکڑزک۔ داخیال آتا درشانی ءِ او دوشنبے نادے آ کم کٹیا کروک تپہ ءِ ریلیف فراوان کننگ نا بابت آن دیوان نا کماشی ءِ کرساکرے۔ دیوان اٹی وزیر ڈٹ بندی اسد عمر، سلاہکار خزانہ ڈاکٹر عبدالحفیظ شیخ، سلاہکار اصلاحات ڈاکٹر عشرت حسین، خصوصی کمکار راجی رکھ ڈاکٹر ثانیہ نشتر، مسکوہی وزیر خزانہ شوکت ترین و ایلو سینئر آفیسر آک ساڑی ئسر۔ دیوان اٹی چندی بشخ آتیان تعلق تخوک آ کم کٹیا کروک تپہ غاتے ریلیف نا فراوانی نا بابت حکومت نا کنڈآن کروک آ گام گیج و اوفتے پین گچین کننگ نا بابت آن سلاہ وزیراعظم ءِ پیش کننگا۔ خصوصی کمکار راجی رکھ ڈاکٹر ثانیہ نشتر وزیراعظم ءِ مچ آ ملک اٹی برجا نیزگاری نا اول سر آن سروے نا پیش رفت آن ہم معلومدار کرے۔ وزیراعظم دیوان آن تران کرسا پارے کہ کم کٹیا کروک تپہ غاتا بنداوی گرج آتا خیال ءِ تخنگ ریاست نا زمواری ءِ ہرا دے ساڑی حکومت ہرفینے۔ اوپارے کہ کم کٹیا کروک تپہ غاتا بنداوی گرج آتے پورو کننگ ءِ پک کننگ حکومت ہروڑاٹ کوشست کننگ کن پرعزم ءِ۔ وزیراعظم پارے کہ راج انا نزور تپہ غاتے بنداوی ضرورت نا گڑاتا فراوانی کن حکومت نا کنڈآن یوٹیلیٹی اسٹور نیٹ ورک انا کمک اٹ کمک فراوان کننگ ءِ تانکہ داوڑنا بندغ و خاہوت آتے نت، سی، بورہ و دال کون آ ہردے نا بنداوی ضرورت نا گڑاتا دوئی کننگ اٹ آسانی دوبرے۔
