اسلام آباد۔ 02مارچ(اے پی پی) صدر مملکت ڈاکٹر عارف علوی پارینے کہ اسلام ءِ مون آ دننگ اٹ عالم دین تا بھلو کڑد اسے، راج انا اصلاح کن مسیت و عالم دینک اہم ءُ کڑد اس ادا کننگ کیرہ، خور انا کمتی و چناتے ٹی سٹنٹنگ نا توننگ کن چناتا ودی کننگ اٹ وقفہ المی ءِ، و قرآن اٹی دانا پرمان ارے۔ دوشنبے نادے آ بنجائی دارالحکومت اٹی راجی اصلاح ٹی عالم دین تا کڑد انا بابت دود آن تران کرسا اوپارے کہ پاکستان اٹی 9 درسد خلقت ہیپاٹائٹس نا گواچی ءُ۔ اوپارے کہ اسلام ءِ مون آ دننگ اٹ عالم دین تا اہم ءُ کڑداسے، اسلام اٹی سفائی ءِ بنداوی ءُ اہمیت اس دوئی ءِ۔ صدر مملکت پارے کہ پاکستان اٹی پڈپُر زالبول آتا گیشتری خور انا کمتی نا گواچی ءُ، 40 درسد چناک سٹنٹنگ نا گواچی ءُ ہراڑآن دماغی لائخی ٹی کمتی بریک۔ اوپارے کہ دانا اسٹ انگا ایسری چناتا ودی کننگ اٹ وقفہ ءِ، 24تُو اسکان چناتے پال کنفنگ نا قرآن اٹی مسہ وار ذکر ارے۔
