اسلام آباد۔ 02مارچ(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان کبینی ٹی کمتی و الس ءِ ریلیف تننگ کن پرعزم ءِ، اونا عملی گام گیج آتا بھرم الس اسکان سرمننگ نا بناءِ کرینو، سی پی آئی نارداٹ خور انا نہاد آتے ٹی پیدوار کمتی مون آ بسنے، کنوئی آ گڑاتا نہاد آک اینخو نا سال جنوری نا 14.6درسد نا کچ انا مقابلہ ٹی کم مرسا فروری ٹی 12.4درسد مس۔ دوشنبے نادے آ تینا ٹویٹ اٹی اوپارے کہ وزیراعظم عمران خان کبینی ٹی کمتی و الس ءِ ریلیف تننگ کن پرعزم ءِ۔ ڈاکٹر فردوس عاشق اعوان پارے کہ شاری علاقہ غاتے ٹی کنوئی آگڑاتا نہاد آک 13.4درسد(جنوری) آن کم مرسا 11.2 درسد (فروری) ٹی مسر۔ خلقی آ علاقہ غاتے ٹی 16.3درسد آن کم مرسا 14.2 درسد آ بسنو، دا کمتی ہڑدے ئی ضرورت نا گڑاتا نہاد آتے ٹی ہم نظر بس ہرانا براہ راست فائدہ الس ءِ مننگ ءِ۔ اوپارے کہ کنوئی آ گڑاتا نہاد آک جنوری ٹی 19.5درسد ئسر ہرافروری ٹی کم مرسا 15.2 درسد مسر وخت اس کہ کنوئی آ گڑاتیان بیدس ایلو ضرورت نا گڑاتا نہاد آک ڈبل آن سنگل ڈیجیٹ اٹ بسنو، مارچ اٹی نہاد آتے ٹی پین کمتی بننگ نا گما ن ءِ۔
