پشاور ۔ 28فروری (اے پی پی) صدر ڈاکٹر عارف علوی ءَ را ساپ ء ُ سلہی ءِ حاس کنگءِ ضلورت ءِ سرءَ زور پِرداتگء ُ گشتگ کہ کرونا وائرس ءِ شنگ بوہگءِ سرءَ سرج میں ملک تکانسریءِ آماچ اِنت، تاں انوں 51ملک کروناوائرسءِ آماچ بوتگ اَنت، پاکستانءَ ہم ایشیءِ شنگ بوہگءِ تُرس انت بلے تُرسگءِ بدلءَ رکینگی رھبند جوڑ کنگ لوٹ ایت، دستاں شودگءِ وہدءَ سابن کارمرز کنگ بہ بیت ۔ اے ھیالانی درشانی آئیءَ جمعہ ءِ روچءَ گیسٹرالوجی کانفرنس ءَ گوں تران کنانءَ کتگ ۔ صدرءَ گشتگ کہ مارا نادراہی ءَ چہ رکینگءِ ھاترءَ حاسیں دلگوشی کنگ لوٹ ایت ۔ آئیءَ جانء ُ سلامتی ءِ پڑءَ غیرسرکاری تنظیم آنی کردءَ را ساڑاتگ ۔ آئیءَ گشتگ کہ اے موہءَ آ راجی تکانسری ءِ یک حاسیں جیڑہ ءِ سرءَ گپ کنگ لوٹ ایت کہ کرونا وائرس ءِ شنگ بوہگءِ سرءَ سرج میں ملک تکانسریءِ آماچ اِنت، تاں انوں 51ملک کروناوائرسءِ آماچ بوتگ اَنت، پاکستانءَ ہم ایشیءِ شنگ بوہگءِ تُرس انت بلے تُرسگءِ بدلءَ رکینگی رھبند جوڑ کنگ لوٹ ایت ۔ آئیءَ گشتگ کہ حضورنبی کریم ﷺ ءَ ساپ ء ُ سلہّ بوہگءِ سکین دا تگ ۔ صدرءَ گشتگ کہ ایشیء َ پیسر من ٹوتھ برش زُرتگء ُ اُلسءَ را دانتان ساپ کنگءِ ارزشت ءَ سرپد کتگ مردماں اے گپءِ کلاگ زُرتگ ۔ دانتانی ساپ کنگءِ ہوالگءَ22حدیث اَست اَنت ۔ آئیءَ گشتگ کہ کرونا وائرس ءِ سوبءَ سعودی عربءَ عمرہ ءِ ویزہ ءَ را ادارکی بند کتگ ۔ ایران ءَ جمعہ ءِ نماز مُچی ءِ سرءَ بندش جتگ ۔ بلوچستان ءَ وانگ جاہ پہ لھتیں روچانی ھاترءَ بند کنگ بوتگ اَنت ۔ جاپان وڑیں ملک ءَ درائیں وانگ جاہ بند کنگ بوتگ اَت ۔ آئیءَ گشتگ کہ مارا تُرسگی نا ایں مارا رکینگی گامگیج کنگی اِنت ۔ آئیءَ گشتگ کہ ماسک دپءَ بہ کن اَنت ۔ وت ہم لوگء َ ماسک جوڑ بہ کن اَنت ۔
