کوءٹہ ۔ 28 فروری (اے پی پی) صوبائی وزیر خزانہ ظہور احمد بلیدی پارینے کہ شاری دفاع نا تربیت ترسا الس ءِ ہروڑنا شکست آتے ٹی زہمی تے وخت آ کمک فراوان کننگ کن تیار کننگے ۔ شاری دفاع نا تربیت اسکول آتیان بناکننگے ۔ تانکہ بھلن مننگ آن چناتے غٹ تر شکست آتا بابت علم و آگاہی مرے ۔ ہنداوڑ داشکست آتے ٹی بھلا نسخان آتے کم کننگ مریک ۔ داخیال آتا درشانی ءِ او جہانی یوم شاری دفاع نا بابت اسہ کلہو اسے ٹی کرے ۔ اوپارے کہ بحیثیت قوم دا ہر شاری نا زمواری ءِ کہ ناخوشگوار حالیت آتون مون تننگ کن غٹ تر درکار گرج و خواست آتا بابت تینے آگاہ تخرتانکہ اوفتا کمک کن تینا خذمت آتے رضاکارانہ وڑاٹ پیش کننگ کیر ۔ اوپارے کہ موسمی تغیرات آتا سوب آن ملک اٹی قدرتی آفت آتا بننگ اسہ فطری ءُ عمل اسے ۔ داڑکن ننے پیشگی تیار کننگ نا گرج ءِ تانکہ خلقت ذہنی وڑاٹ قدرتی و انسانی غلطی تا پاداش اٹ بروک آ آفت آتے ٹی سکون و رکھ مریر ۔ و پین نسخان آتیان بچر ۔ صوبائی وزیر پارے کہ شاری دفاع نا محکمہ ءِ شاری تا تربیت و کاریم نا کچ ءِ ودفنگ کن پین فعال کڑد ادا کننگ نا گرج ءِ ۔ و داوڑکننگ کن حکومتی کہول آ اوفتے پورو سرپرستی دوئی مریک ۔ داڑتون اوار میڈیا قدرتی آفت آتا بابت آگاہی و معلومداری ءِ لس کننگ کن سرگرم کڑد اداکے تانکہ دا آفت آتا سدباب کن السی کہول آ کاریم مننگ کے ۔
