کوءٹہ ۔ 28 فروری (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ اسہ بڑزکو کہولی دیوان اسے ٹی کرونا وائرس نا دروشم اٹ مون تروک چیلنج تون گچین وڑاٹ مون تننگ و الس ءِ دا وائرس تون اوار ایلو غٹ دین تیان رکھ کننگ نا بابت گام گیج آتا جاچ ءِ ہلنگ کن بڑزکو کہولی دیوان اس اڈ ہلک،صوبائی وزیر میر ظہور احمد بلیدی، ایڈیشنل چیف سیکرٹری داخلہ حافظ عبدالباسط، چیئرمین وزیراعلیٰ معائنہ ٹیم سجاد احمد بھٹہ، آئی جی پولیس محسن حسن بٹ ، سیکرٹری خزانہ نور الحق بلوچ، ڈائریکٹر ہیلتھ سروسز سدرن کمانڈ بریگیڈیئر ذوالقرنین، ڈی جی پی ڈی ایم اے عمران زرکون، کوءٹہ نا سرکاری ہسپتال آتا میڈیکل سپرنٹنڈنٹس ، کمشنر کوءٹہ ڈویژن دیوان اٹی ساڑی ئسر وخت اس کہ ایلو ڈویژنل کمشنر آک ویڈیو کانفرنس نا کمک اٹ دیوان اٹی بشخ ہلکر، سیکرٹری محکمہ جان جوڑی مدثر وحید ملک ، و اسپیشل سیکرٹری جان جوڑی طاہر عباسی ئسک دیوان ءِ کرونا وائرس تون مون تننگ ، دانا توننگ و داوخت اسکان کروک آ رکھی تدابیر آتیان معلومدار کریر ، دیوان ءِ پاننگاکہ اسپیشل سیکرٹری جان جوڑی نا کماشی ٹی صوبائی ٹاسک فورس اس جوڑ کننگانے ، وخت اس کہ ایران و اوغانستان تون گنڈوک دہ ضلع غاتے ٹی کرونا وائرس ایمرجنسی نافذ کننگانے، تدوک آ دے تیٹی ایران آن پدی بروک آ زائر آتا اسکریننگ نا عمل نا بناءِ کننگانے و پی ڈی ایم اے ٹی تعلقدار محکمہ غاتا اسیجا مرکزی کنٹرول روم اس جوڑ کننگانے، دہ حساس ضلع غاتا ہسپتال آتے ٹی آئیسولیشن ہند آتے جوڑ ہلہلہ ئی بنداوتیا کننگ انگ ءِ و مسہ سد آئیسولیشن روم تیکن المی ازباب آتا ہلنگ نا عمل نا بناءِ کننگانے، حساس ضلع غاتے ٹی پنچ ہزار ماسک سرکننگانے، قرنطینہ ایس او پی ءِ نافذ العمل کننگانے ، دیوان ءِ پاننگاکہ حساس ضلع غاتے ٹی تھرموگنز و 231 ایمبولینس ساڑی ءُ، تفتان اٹی اِرا آئیسولیشن رومز، ماشکیل اٹی اسہ آئیسولیشن روم، چندگی ٹی اسہ آئیسولیشن روم، ردیک مند اٹی اسہ آئیسولیشن روم و گبد اٹی اسہ آئیسولیشن روم انا آسراتی فراوان کننگ انگ ءِ ، پاک اوغان سیم انا انٹری پوائنٹ آتیا ہم تھرموگنز، ماسکس ، ایمبولینس و ایلو آسراتی تتون میڈیکل اسٹاف تعینات کننگانے، چمن اٹی اِرا آئیسولیشن روم، بادینی ٹی اسہ آئیسولیشن روم اس، براپچہ ٹی اسہ آئیسولیشن روم و قمر دین کاریز اٹی ہم اسہ آئیسولیشن روم نا آسراتی کننگ انگ ءِ ، دیوان ءِ معلومدار کننگاکہ کوءٹہ ٹی فاطمہ جناح چیسٹ اینڈ جنرل ہسپتال اٹی دہ کٹ آتیا تالان وارڈ ءِ بشخسا اودے آئیسولیشن مرکز اس جوڑ کننگانے ، شیخ زید ہسپتال اٹی دہ روم تیا تالان آئیسولیشن ہند جوڑ کننگانے، رورل ڈویلپمنٹ اکیڈمی کمپلیکس نا چانڑدہ کمرہ غاتیا تالان ہاسٹل ءِ آئیسولیشن مرکز اس جوڑ کننگ کن گام گیج کننگ انگ ءِ ، ہنداوڑ گودی بے نظیر گرلز ہائی اسکول ہزارہ ٹاءون و یونیورسٹی کمپلیکس مری آباد اٹی ہم قرنطینہ جوڑ کننگک ہرافتا زمواری این ڈی ایم اے و پی ڈی ایم اے نا حوالہ کننگک ۔
