اسلام آباد ۔ 28 فروری (اے پی پی) وزیراعظم عمران خان پارت کرے کہ کارٹیلز و ناروا کٹیاخوری نا سوب مروک آتا برخلاف ایکشن آ ہم پبی چکار کننگے تانکہ الس ءِ دُزی، سسٹم نا ڈیوالائی و استحصال آن بچفنگ مرے، سبسڈی نا فراوانی تون اوار اوار دا ہیت ءِ پک کننگے کہ دا پیسہ غاک تعلقدار بندغ و تعلقدار مسخت کن فائدہ تروک مریر ۔ وزیراعظم عمران خان نا کماشی ٹی جمعہ نادے آ کم کٹیا و نزور تپہ غاتے ریلیف نا فراوانی کن چندی بشخ آتے ٹی حکومت نا کنڈآن تروک آ سبسڈی نا زہم آتا جاچ انا دیوان اس اڈ ہلک ۔ دیوان اٹی وزیر توانائی عمر ایوب م، وزیر ڈٹ بندی اسد عمر، سلاہکار واپار عبدالرزاق داءود ، سلاہکار خزانہ ڈاکٹر عبدالحفیظ شیخ ، خصوصی کمکار حوالکاری ڈاکٹر فردوس عاشق اعوان ، خصوصی کمکار راجی رکھ ڈاکٹر ثانیہ نشتر ، گورنر اسٹیٹ بینک سید رضا باقر ، سیکرٹری خزانہ و ایلو سینئر آفیسر آک ساڑی ئسر ۔ دیوان اٹی توانائی ، خور، فرٹیلائزر نا بشخ اٹی حکومت نا کنڈآن تروک آ سبسڈی تون اوار اوار راجی رکھ انا احساس پروگرام، برآمد آتے ٹی ودکی کن چندی بشخ و بڑزکو تعلیم نا مون آ دننگ کن حکومت نا کنڈآن تدوک آ و اینخو مالی سال اٹی تروک آ پیسہ غاتا کچ و اوفتا کاریم اٹ اتنگ نا بارواٹی سرجم حوال تننگا ۔ دیوان ءِ پاننگاکہ حکومت نا کنڈآن تروک آ سبسڈی نا بنداوی مسخت الس و خاص وڑاٹ نزور و کم کٹیا کروک تپہ ءِ ریلیف تننگ، صنعت آتا مون آدننگ و بڑزکو تعلیم اسکان رسینگ اٹ آسراتی فراوان کننگ ءِ ۔ دیوان اٹی پاننگاکہ توانائی نا بشخ اٹی جم وڑاٹ 251 ارب روپئی نا سبسڈی فراوان کننگ انگ ءِ، 300 آن کم یونٹ کاریم اٹ اتوک آ صارف آتے کن کم نہاد آ بجلی نا فراوانی ءِ پک کننگ کن حکومت نا کنڈآن دا سال 162 ارب روپئی نا سبسڈی اس تخانے ۔ بلوچستان اٹی کشاری ٹیوب ویل تیکن ہشت ءُ نیم ارب روپئی وخت اس کہ اوار کروک علاقہ غاتا الس کن 18 ارب روپئی تننگ انگ ءِ ۔ داڑتون اوار اوار آزاد جموں و کشمیر و کے الیکٹرک کن بالترتیب 3 ارب و 25 ارب روپئی فراوان کننگ انگ ءِ ۔ صنعتی بشخ ءِ مناسب نہاد آ بجلی نا فراوانی کن 10 ارب روپئی وخت اس کہ گیس انا فراوانی نا مد اٹی 24 ارب روپئی تننگ انگ ءِ ۔ خولم و نت انا نہاد آتے مون ءِ توننگ اٹ تخنگ کن ہم حکومت نا کنڈآن ارب آ روپئی سبسڈی نا مد اٹی فراوا ن کننگ انگ ءِ ۔ دافتے ٹی سٹریٹجک کوڑی تے پک کننگ کن 5 ارب روپئی ، گلگت بلتستان کن خولم نا بقایاجات آتا مد اٹی 8 ارب روپئی ، یوٹیلٹی اسٹور تیا روچہ پیکج کن دونیم ارب روپئی وخت اس کہ پرائم منسٹر ریلیف پیکج نا مد اٹی 21 ارب روپئی سبسڈی ءِ ۔
