اسلام آبا دہائی کورٹ نا چین اٹی رہینگوک آ پاکستانی طالب علم آتا لمہ و باوہ غاتا محکمہ جان جوڑی نا کمامدارآتون اوڑدہی کرفنگ نا پرمان

اسلام آباد ۔ 28 فروری (اے پی پی) اسلام آباد ہائی کورٹ چین اٹی رہینگوک آ پاکستانی طالب علم آتا لمہ و باوہ غاتا کابینہ سیکرٹری، وزیراعظم نا خصوصی کمکار سمندر پار پاکستانیز و محکمہ جان جوڑی نا کمامدار آتون اوڑدہی کرفنگ نا پرمان کرینے ۔ جمعہ نادے آ چین آن پاکستانی طالب علم آتا پدی اتنگ کن دائر درخواست نا عدالت عالیہ نا چیف جسٹس اطہر من اللہ سماعت ءِ کرے ۔ سماعت اٹی وزارت جان جوڑی نا نمائندہ عدالت اٹی موقف اختیار کریر کہ لمہ و باوہ غاتے ہر وڑنا کمک فراوان کننگ کن کمیٹی اس جوڑ کرینن ۔ وزارت خارجہ نا نمائندہ پارے کہ چینی حکومت نا پوسکن آ رپورٹ ءِ بروئی ءِ، اوکان پد کابینہ فیصلہ کیک، چیف جسٹس وزارت خارجہ نا نمائندہ ءِ مخاطب کرسا پارے کہ عدالت نما کاریم نا ستاءِ کیک ۔ لمہ و باوہ غاتے گام گیج آتیان است جم کبو ۔ لمہ و باوہ غاتا وکیل دلیل تس کہ طالب علم و حکومتی موقف اٹی پرخ ارے، عدالت دا کیس اٹی پرمان کے، چیف جسٹس ریمارکس تس کہ سنگین حالیت آک ءُ، فیصلہ حکومت ءِ کروئی ءِ ، داعدالت و داڑے ساڑی اسہ بندغ اس ہم ماہر اف ہرا دا ویل انا ایسر اس کشے، عدالت بیرہ لمہ و باوہ غاتے است جم کننگ کن درخواست ءِ بِننگ ءِ ۔ عدالت قرارتس کہ لمہ و باوہ غاتا کنڈآن 4باسکی وکلاٹیم سیکرٹری کابینہ ، خصوصی کمکار سمندر پار پاکستانیز و وزارت جان جوڑی نا نمائندہ غاتون اوڑدہی کیرہ ۔ عدالت مستی سماعت ءِ 6مارچ اسکان پد بٹے ۔