پشاور ۔ 28 فروری (اے پی پی) صدر مملکت ڈاکٹر عارف علوی الس آ جان جوڑی و سفائی نا خصوصی خیال تخنگ نا گرج آ زور شاغسا پارینے کہ کروناوائرس نا تالانی گڑتی نا سوب ءِ ، داوخت اسکان 51ملک کرونا وائرس نا گواچی مسنو، پاکستان اٹی ہم دانا تالان مننگ نا گڑتی ءِ ولے نن خوفزدہ مننگ نا جاگہ غا رکھی تدابیر اختیار کین ، دوتے سلنگ نا وخت آ صابن نا کاریم اٹ اتنگ ءِ پک کین ۔ داخیال آتا درشانی ءِ او جمعہ نادے آ داڑے گیسٹرالوجی کانفرنس آن تران کرسا کرے ۔ صدر مملکت پارے کہ ننے مرض آن بچنگ آ خصوصی چکار کروئی مریک ۔ مہلک مرض آتیان بچنگ کن ڈاکٹرز و طبی چاہندار آک فعال کڑد ادا کیر ۔ اوجان جوڑی نا بشخ اٹی غیر سرکاری تنظیم تا کڑد انا ستاءِ کرے ۔ اوپارے کہ داوخت آ او قومی گڑتی نا اسہ اہم ءُ معاملہ سے آ ہیت کننگ خواہک ۔ کرونا نا تالانی اسہ گڑتی نا سوب ءِ ۔ داوخت اسکان 50 آن زیات ملک آتے ٹی کرونا وائرس سرمسنے ۔ اللہ تعالیٰ ننا کمک ءِ کے و انشاء اللہ پاکستان اٹی دا تالان مفک ولے میڈیکل سائنس نا رداٹ اگہ 51ملک آتے ٹی دا تالان مسنے تو داڑے ہم دانا تالان مننگ نا گڑتی ءِ ہنداخاطرآن ننے دا تنکی تون مون تننگ کن گام گیج کروئی مریک ۔ غٹ آن مست ننے حالیت آتے کن تینے تیار کروئی مریک و احتیاطی تدابیر آ چکار کروئی مریک ۔ دا چرجوئی ٹی غٹ آن زیات اہم ہیت دادے کہ دوتے سلنگ نا وخت آ صابن نا کاریم اٹ اتنگ ءِ پک کین، دا چرجوئی ٹی آگاہی مہم اس چلیفنگ نا گرج ءِ و الس ءِ دا پاننگے کہ خواجہ نبی کریم ﷺ جا ن جوڑی و سفائی و طہارت آ اخہ در زور شاغانے ۔ صدر مملکت پارے کہ داکان مست ای ٹوتھ برش اٹ الس ءِ دنان تا سفائی نا اہمیت نا بابت معلومدار کریٹ تو ملنڈ خلنگا ۔ دنان تا سفائی نا بابت آن 22حدیث ءُ ۔ ننا دین ننا پیغمبر ﷺ و خلفائے راشدین راج اٹی ہر پلو آن خلقت ءِ آگاہی فراوان کریر انتئے کہ قومک ہنداوڑ جوڑ مریرہ ۔ صدر مملکت پارے کہ خاص کر کرونا وائرس نا چرجوئی ٹی احتیاطی تدابیر اٹی غٹ آن زیات اہم دادے کہ دوتے سلبو و جھکہ یا اچان برے تو و گڑاسے نا گڑاسے ٹی مون ءِ ڈکبوو ماسک پنبو ۔ کرونا وائرس نا سوب آن سعودی عرب عمرہ نا ویزہ غاتے عارضی وڑاٹ بند کرینے ۔ ایران جمعہ نا نماز نا جماعت آتیا ہم پابندی خلکونے ۔ بھلا بھلا برام تا دود و مچی اڈتننگپ ۔ بلوچستان اٹی اسکول آتے منہ دے اکن بند کننگانے ۔ جاپان کون آ ملک اٹی غٹ اسکول آتے بند کننگانے ۔ دین نا تالان مننگ نا گڑتی نا رداٹ ننے احتیاطی تدابیر اختیار کننگ نا گرج ءِ ولے نن خوفزدہ مفن ۔ حکومت دا خطرہ غان معلومدار ءِ و المی گام گیج کننگ ءِ ۔ صدر مملکت شاری تیا زور شاغا کہ ماسک بیننگ اٹ عار محسوس کپس ۔ تینٹ تینا اُراٹی ہم ماسک جوڑ کننگ کیرہ ۔ او راج اٹی دا بابت آن آگاہی ودی کننگ کن آئمہ کرام و پیش امام تا اہمیت ءِ ہم تالان کرے و پارے کہ اوفتے ہم منبر نا کمک اٹ راج اٹی آگاہی ودی کیر ۔ اوقوم آن خواست کرے کہ او جان جوڑی و سفائی و طہارت نا اصول آتے اختیار کیر تو نئے بیرہ مرض آن بچنگ و جان جوڑ راج اسے نا جوڑ مننگ اٹ کمک رسینگک بلکن دا اجر و ثواب و آخرت ءِ جوڑ کننگ نا ذریعہ ہم مریک ۔
