اسلام آباد ۔ 28 فروری (اے پی پی) سینیٹ نا قائمہ کمیٹی حوالکاری و شین کاری نا چیئرمین سینیٹر فیصل جاوید پارینے کہ مسکوہی حکمران تا پالیسی تا سوب آن کبینی ءِ ، موڈیز کون آ جہانی ادارہ امنا کننگ ءِ کہ ملکی زرگزران سوگو ءِ، اینو دنیا کشمیر کن توار بڑز کننگ ءِ ، وزیراعظم عمران خان اقوام متحدہ ٹی نئے بیرہ کشمیر امت مسلمہ کن توار بڑز کرے ، بھارت سیاسی و سفارتی تنیائی نا شکار ءِ ۔ جمعہ نادے آ ایوان بالا نا دیوان اٹی قومی اسمبلی ٹی پیش کروک آ آرڈیننس آتے سینیٹ اٹی پیش کننگ، ڈیہہ خاص وڑاٹ مقبوضہ کشمیر اٹی سیکورٹی و سیاسی حالیت، حزب اختلاف ءِ پدریسہ سیاسی بیر انا شست کننگ، اُرائی و صنعتی بشخ آتے ٹی گیس و بجلی نا کاختی، کبینی و چناتا برخلاف ہردے وقوع پذیر مروک آ گندہ انگا ڈوہ تا بابت تحریک آ شرہ ٹی بشخ ہلسا سینیٹر فیصل جاوید پارے کہ وزیراعظم عمران خان پانامہ نا برخلاف پبی توار بڑز کرے تو اونا برخلاف مقدمہ نوشتہ کننگا، منی لانڈرنگ و وڈی خوری نا بابت مچ آ دنیا نا کرپٹ خلقت مون آ بسر، دا معاملہ غا توار بڑز کننگ آ عمران خان آ مقدمہ جوڑ کننگ سیاسی بیر اس ئس، عمران خان نا غٹ میرات آتا جاچ ءِ ہلنگا، او40سال متکن آ دستاویز آتے پیش کرے ، اسہ اسہ پیسہ نا حساب ءِ تس ، او عدالت آن سرسہب مس ۔ اودے صادق و امین گوندنگا، ہرافتیا دوبہ ئس اوفک جعلی قطری چھٹی و معاہدہ کتوس، خیبر پختونخوا ٹی پنچ سال حکومت اٹی ہچ کس ءِ سیاسی بیر انا شکار کتو، اوفتا برخلاف مقدمہ چلینگ انگ ءِ او اوفتا اسہ ایلو نا برخلاف جوڑ کروک ءُ ننا وزیر آک بدعنوانی نا دوبہ غاتیا استیفہ تسر، مسکوہی حکمران تا پالیسی تا سوب آن کبینی ءِ ، ملک انا مثبت دروشم ءِ تالان کننگ کن نن غٹ اواری اٹ بایدے کاریم کین ۔
