کوءٹہ ۔ 28 فروری (اے پی پی) وزیراعلیٰ بلوچستان جام کمال خان تون وزیراعظم نا خصوصی کمکار جان جوڑی ڈاکٹر ظفر مرزا تفتان و دالبندین نا دورہ ءِ کننگ آن پد اوڑدہی کرے، بنجائی سیکرٹری جان جوڑی، ایڈیشنل چیف سیکرٹری داخلہ، صوبائی سیکرٹری جان جوڑی و ایلو کمامدارآک ہم داوخت آ ساڑی ئسر، وزیراعظم نا خصوصی کمکار وزیراعلیٰ ءِ تینا دورہ تفتان اٹی کرونا وائرس نا توننگ نا بابت گام گیج آتا جاچ انا سرجم آتیان معلومدار کرے ہرادے مون آ تخسا ایران آن پاکستان آ پدی بروک آ زائر ، پوریا گر و ایلو بندغ آتا پدی نا وڑوڈول، اوفتا اسکریننگ و اوفتا پاکستان ہاءوس اٹی اڈکننگ نا بابت باندات آتا جاچ ءِ ہلنگا و دا بابت آن گڑاس ہم فیصلہ کننگا ۔ خصوصی کمکار پارے کہ تفتان اٹی اڈ کروک آ ہمو زائر آک ہرا ایران آ ہِننگ خوارہ رضاکارانہ وڑاٹ پدی بننگ آ رضامندی ظاہر کرینو ہرافتا کچ 273ءِ، اوڑدہی ٹی فیصلہ کننگاکہ اوفتے سیکورٹی و سفری آسراتی فراوان کرسا دمدستی وڑاٹ کوءٹہ غا اتننگک ۔ خصوصی کمکار معلومدار کرے کہ ایران نا وزارت جان جوڑی پاکستان آ پدی بروک آ زائر آتا ٹیسٹ و اسکریننگ ءِ کننگ و اوفتے ہموڑے اسہ ہفتہ اسکان زیر نگرائی تخنگ نا پیشکش کرینے ۔ اوپارے کہ پیشکش نا سسرجم جاچ ءِ ہلسا دا بابت آن زائر آتا فائدہ نا رداٹ فیصلہ کننگک، ایلو دروشم اٹ پک کننگاکہ تفتان اٹی پاکستان ہاءوس اٹی ہلہلہ ئی بنداو تیا قرنطینہ و آئیسولیشن وارڈ اس جوڑ کننگک و زائر آتے اسہ اسہ ہزار نا کچ اٹی ہردے اسکریننگ آن پد پدی اتنگک و زائر آتے اسہ ہفتہ اسکان قرنطینہ ٹی زیر نگرانی تخنگک، کرونا وائرس نا نشان خنوک آ بندغ ءِ پین تشخیص کن آئیسولیشن وارڈ اٹی تخنگک و کوءٹہ ٹی ساڑی ٹی جوڑ کروک آ لیبارٹری ٹی دانا نمونہ ءِ ٹیسٹ کننگک، اوڑدہی ٹی دا ہم پک مس کہ دالبندین ہسپتال اٹی غٹ آسراتی تیان آراستہ آئیسولیشن وارڈ اس ہلہلہ ئی بنداو تیا تیار کننگک و کرونا وائرس آن زہمی بندغ آتے پورو جان جوڑ مننگ اسکان ہموڑے تخنگک، اوڑدہی ٹی دا ہم پک کننگاکہ راہداری آ زاہدان اسکان ہنوک آ پوریاگر و ایلو بندغ آتا آسان واپسی ءِ ممکن کننگک و اوفتا اسکریننگ ءِ کرسا اوفتے پاکستان اٹ پترینگ انگ نا موکل تننگک ولے غٹ زائر و پوریا گر تا ڈکلیئریشن فارم ہلنگک ہراٹی اوفتا غٹ معلومداری درج مریک تانکہ اوفتے تون پدریسہ رابطہ ٹی مننگ مرے ۔ وزیراعلیٰ پارے کہ صوبائی حکومت تفتان اٹی قرنطینہ و تفتان و دالبندین اٹی آئیسولیشن وارڈ انا جوڑ کننگ کن دمدستی وڑاٹ دوسد ملین روپئی جاری کرینے، اوڑدہی ٹی پک کننگاکہ وزار ت جان جوڑی نا کنڈآن جاری کروک ایس او پیز نا رداٹ این ڈی ایم اے ، پی ڈی ایم اے ، ایف ڈبلیو و محکمہ جان جوڑی نا شریداری اٹ قرنطینہ و آئیسولیشن وارڈ انا جوڑ کننگ نا کاریم ءِ دمدستی وڑاٹ بناکننگک ۔ دہ ودکی ڈاکٹر و چیسٹ اسپیشلسٹ طبی عملہ تون تفتان اٹی تعینات مریک ہرافتا نوٹیفکیشن ءِ جاری کننگانے ۔ اوڑدہی ٹی تفتان اٹی طبی و انتظامی باندات نا چین آف کمانڈ نا قیام نا فیصلہ ءِ ہم کننگا و ڈی ایچ او چاغی ءِ طبی باندات نا فوکل پرسن، ڈپٹی کمشنر ءِ انتظامی امور نا فوکل پرسن و وزیراعلیٰ سیکرٹریٹ نا ڈپٹی سیکریٹری کیپٹن جمعہ داد مندوخیلءِ وزیراعلیٰ سیکرٹریٹ نا فوکل پرسن تعینات کننگ نا فیصلہ کننگا ، داوخت آ وزیراعلیٰ کوءٹہ ٹی ہم قرنطینہ نا جوڑ کننگ نا پارت کرے ۔
