زالبول آتے زرگزرانی وڑٹ واکدار جوڑ کننگ آن زرگزرانی انقلاب نا تغ ءِ پورو کننگ مریک ، گورنر بلوچستان امان اللہ خان یاسین زئی

کوءٹہ ۔ 27 فروری (اے پی پی) گورنر بلوچستان امان اللہ خان یاسین زئی پارینے کہ زالبول آتے زرگزرانی وڑٹ واکدار جوڑ کننگ آن زرگزرانی انقلاب نا تغ ءِ پورو کننگ مریک انتئے کہ زرگزرانی وڑاٹ آسودہ زالبول آک ایلو غٹ حق اختیار آتا دوئی کننگ کن پبی کڑد ادا کننگ کیرہ ۔ گورنر پیدوار کرے کہ اقتصادی وڑاٹ سوگو و محکم زالبول آک نئے بیرہ ملک و قوم انا راجی و زرگزرانی شونداری ٹی اہم ءُ کڑد اس ادا کننگ کیرہ بلکن تینا اُرانا باندات آتے چلیفنگ و تینا چناتے بڑزکو تعلیم و تربیت اس تننگ اٹ ہم گچین راہشونی فراوان کننگ کیرہ ۔ داخیال آتا درشانی ءِ او پنچ شنبے نادے آ گورنر ہاءوس کوءٹہ ٹی صوبائی زالبول محتسب صابرہ اسلام تون اوڑدہی ٹی گپ وتران کرسا کرے ۔ داوخت آ گورنر بلوچستان پارے کہ ننا کل آبادی نا نیمہ غان زیات بشخ زالبول آتیا تالان ءِ ۔ ہنداخاطرآن المی ءِ کہ غٹ راجی، تعلیمی وزرگزرانی سرجزآتے ٹی اوفتا اوار مننگ و بشخ ہلنگ ءِ پک کیر ۔