اسلام آباد ۔ 27 فروری (اے پی پی) ڈپٹی اسپیکر قاسم خان سوری تعلیم، جان جوڑی و اقتصادی نظام نا گچینی کن کانود جوڑ کننگ ءِ وخت انا اہم ءُ گرج اس گوندسا پارینے کہ ملک اٹی بھلو کچ اس نیزگاری نا لکیر آن شیف زند ءِ تیر کننگ آ بیوس ءُ، غٹ پارلیمنٹرین آک دا حالیت آتا ادراک ءِ کرسا زموارانہ کڑد ادا کیر ۔ پنچ شنبے نادے آ پاکستان انسٹیٹیوٹ آف پارلیمنٹری سروسز اٹی پارلیمانی نظام کار و گچین کاری حلقہ غاتون وابستگی نا سرحال آ مروک آ ورکشاپ نا بنائی دود آن تران کرسا ڈپٹی اسپیکر قومی اسمبلی قاسم خان سوری پارے کہ ورکشاپ نا بست و بند ءِ کننگ گچین ءُ کوشست اسے ۔ کمبوڈیا و ترکی تون اوار غٹ درملکی مندوبین آتے بخیر اٹ پانہ و ورکشاپ اٹی ایلو بشخ ہلوک آتا ہم منت واری ءِ ہرفنہ ۔ اوپارے کہ پاکستان نا پارلیمنٹرینز آتے ایلو ملک آتا پارلیمنٹرینز آتے دا ورکشاپ نا کمک اٹ اسہ ایلو نا آزموندہ غاتیان فائدہ ہرفنگ نا موقع ملک و اوفتے السی راجی آسراتی کن کانود جوڑ کننگ نا بابت آگہی دوئی مریک ۔ اوپارے کہ پاکستان اسہ پرامن ءُ ملک اسے و ننے دنیا ءِ کلہو تروئی ءِ کہ نن السی فلاح آ باور کینہ ۔ قاسم خان سوری پارے کہ گچین مروک آ نمائندہ غاتا پارلیمانی نظام کار و پارلیمانی نظام کار و آئین آن آگہی نا سخت گرج ءِ ۔ دابابت آن پپس گچین کڑد ادا کننگ ءِ ۔ ننے داوڑنا کانود جوڑ کننگ نا گرج ءِ ہراڑآن ننا نظام تعلیم، جان جوڑی و اقتصادی نظام گچین نا کنڈآ ہِننگ کے ۔ اوپارے کہ بلوچستان اٹی کنوئی کن ساف دیر و السی فلاح نا ڈٹ آتا سخت گرج ءِ ۔ دا بابت کانود جوڑ کننگ وخت انا اہم ءُ خواست اسے ۔ ننا ملک اٹی الس نا بھلو کچ اس نیزگاری نا لکیر آن شیف زند ءِ تیر کننگ ءُ ۔ پارلیمنٹ نا زمواری ءِ کہ دا حالیت آتا ادراک ءِ کے و دانا گچینی کن زموار کڑد ادا کننگ نا گرج ءِ ۔ پپس دا بابت آن اہم کڑد ادا کننگ کیک ۔
