بھارت تینا خلوک آ خار انا خاخر اٹ بھاز بے وڑ ہُشنگ انگ ءِ، وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان

اسلام آباد ۔ 27 فروری (اے پی پی) وزیراعظم نا خصوصی کمکار ڈاکٹر فردوس عاشق اعوان پارینے کہ امریکی صدر ڈونلڈ ٹرمپ بھارت اٹی ہراوڑ پاکستان نا ستاءِ کرے اوڑآن بھارت نا پاکستان ءِ دہشت گردی تون گنڈنگ نا کوشست آتے بھاز بے وڑ شکست و وزیراعظم عمران خان نا بیانیہ ءِ سرسہبی ملانے، بھارت تینا ہی خلوک آ خار انا خاخر اٹ بھاز بے وڑ ہُشنگ انگ ءِ ۔ پنچ شنبے نادے آ نجی ٹیلی ویژن چینل نا پروگرام اٹی گپ وتران کرسا خصوصی کمکار پارے کہ بھارتی وزیراعظم نریندر مودی انتہاپسندی و متصبانہ نسل پرستی آ مبنی سوچ ءِ مون آ دننگ ءِ ، بھارت اٹی مسلمان تیا ظلم دنیا نا مون آ اونا پنی آ جمہوریت پسندانہ دروشم ءِ داغدار کرینے ۔ اومستی پارے کہ بھارت تینا ہی خلوک آ خاخر اٹ بھاز بے وڑ ہُشنگ انگ ءِ و دا خاخر داڑے سلوک اُس اف انتئے کہ دا خار انا خاخر ءِ ، نسل پرستی نا بنداو آ مون آ اتوک آ دا سوچ تینا ایسر اسکان سرمننگ والا ءِ ۔ ڈاکٹر فردوس عاشق اعوان پارے کہ 27 فروری ننکن شرف نا دے ءِ ننا گمر نا دے ءِ ننا فتح نا دے ءِ و قوم دادے ءِ تینا سرسہبی ناوڑاٹ اڈ ایتے، بھارت دا سرپرائز ءِ تینا تاریخ اٹ یات تخک و پاکستان نا فوج اٹی ہم دادے ءِ اسل است دان دننگپک ۔ اوپارے کہ 27 فروری آ نن بھارت ءِ تینا قابلیت، لاءخی و عزم ءِ نشان تسن ۔ قوم 27 فروری 2019ء آ منظر ءِ خنا او اودے مدام یات تخرہ ۔ اوپارے کہ ہراوڑننا پائلٹ آک بھارت نا جہاز ءِ خلکر بٹیر و ولدا ہراوڑ نن انسانی ہمدردی نا رداٹ بھارتی پائلٹ ابھی نندن ءِ پدی ترسا اسہ وار ولدا امن نا موقع تسن داڑآن امن کٹا و بھارت نا انتہاپسندی ءِ شکست مس ۔