اسلام آباد ۔ 27 فروری (اے پی پی) وزیر خارجہ شاہ محمود قریشی پارینے کہ 27 فروری نا بابت آن اینو نادے تاریخ اٹی ہمیشہ یات تخنگک ۔ پنچ شنبے نادے آ 27 فروری نا بابت اسہ بیان اسے ٹی وزیر خارجہ پارے کہ دا دے آ ننا نرزور فوج جیرت و نرزوری نا درشانی ءِ کرسا تاریخ اس نوشتہ کرے ۔ 27 فروری آ نن غٹ آ دنیا ءِ دا کلہو تسن کہ نن رکھوک اُن ۔ آخبت اٹی ہم نن دشمن ءِ تینا ارادہ غاتے ٹی سرسہب مننگ کن الیپنہ ۔ شاہ محمود قریشی پارے کہ بھارتی جہاز ءِ بٹسا نن دشمن ءِ پارین کہ نن داکان گچین دفاعی لاءخی تخنہ ۔ بے چیٹی ٹی بھارتی پائلٹ ءِ یلہ کرسا نن دنیا ءِ امن نا علمبردار مننگ نا کلہو تسن ۔ اینو بھارتی حکومت تینا خلقت آ ظلم و جور و بیدادی کننگ ءِ ۔ وزیر خارجہ پارے کہ ننے تینا فورس آتیا گمر ءِ ہرا وطن نا دفاع کن ہر دم تیار سلوک ءُ ۔ بھارتی حکومت نا کشمیر تون اوار بھارت اٹی مسلمان تا برخلاف ظلم و ستم ءِ خنسا قائد اعظم نا دوقومی نظریہ نا اہمیت ثابت مسنے ۔ اینو نادے داہم ثابت مس کہ پاک فوج جارحیت پسند آخا بلکن جارحیت مخالف ءِ ۔ شاہ محمود قریشی پارے کہ ننا فوج دشمن نا ہرجارحانہ گام انا مقابلہ ءِ کننگ نا لاءخی تخک ۔ پاکستان نا الس ہم ہروڑنا جارحیت نا مقابلہ ءِ کننگ کن ننا بہادر فوج اتون ہم کوپہ سلوک ءُ ۔
