اسلام آباد ۔ 27 فروری (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ پاک فوج و فضائیہ ءِ خراج تحسین پیش کینہ ، پاک فضائیہ نا لاجواب کارروائی مچ آ قوم انا کاٹم ءِ گمر اٹ بڑزاکرینے، پاکستان رکھوک ءِ ، بھارت تینا جارحانہ کارروائی تے اٹ پاکستان ءِ کشمیری ایلم تا مخ تفی آن دزکش کرفنگ کپک ، پاکستان تینا برخلاف مہم جوئی نا پبی ورندی ءِ تس، پاکستان حقی وڑاٹ اسہ پرامن و شون پسند ءُ ملک اسے ۔ پنچ شنبے نادے آ بھارتی جارحیت آ پاکستان نا گچین و پبی ورندی تننگ نا اسہ سال اس پورو مننگ آ تینا کلہو اٹی اوپارے کہ پاک فوج و فضائیہ ءِ خراج تحسین پیش کینہ ۔ پاک فضائیہ نا لاجواب کارروائی مچ آ قوم انا کاٹم ءِ گمر اٹ بڑزاکرینے ۔ پاکستان رکھوک ءِ ۔ اوپارے کہ بھارت تینا جارحانہ کارروائی تے اٹ پاکستان ءِ کشمیری ایلم تا مخ تفی آن دزکش کرفنگ کپک ۔ پاکستان تینا برخلاف مہم جوئی نا پبی ورندی ءِ تس ۔ پاکستان حقی وڑاٹ اسہ پرامن و شون پسند ءُ ملک اسے ۔ اوپارے کہ پاکستان ڈیہہ و جہانی کہول آ امن و سوگوی کن تینا فعال کڑد ءِ ادا کننگ اٹی ءِ ۔ بھارت اٹی 20 کروڑ مسلمان تے پدریسہ تعصب و بیدادی نا شست کننگ ءِ ۔ بنجائی وزیر پارے کہ پاکستان خیر سگالی نا جوزہ نا رداٹ بند پائلٹ ءِ بھارت نا دوٹی تس ۔ پاکستان کرتارپور کوریڈور ریکارڈ مد اٹ پورو کرسا سکھ برادری تا خواست ءِ پورو کرے ۔ پاکستان اوغان امن عمل اٹی تینا مثبت کڑد ءِ ادا کننگ ءِ ۔ علی امین گنڈاپور پارے کہ اقوام متحدہ نا سیکرٹری جنرل پاکستان نا دورہ ءِ کرے ۔ سیکرٹری جنرل جہانی و علاقائی امن کن پاکستان نا کڑد انا ستاءِ کرے ۔ امریکی صدر بھارت نا گل زمین آ ہزار آ بھارتی تا مون آ پاکستان نا گچین کڑد انا ستاءِ کرے ۔ اوپارے کہ پاکستان نا روشنا دروشم دنیا نا مون آ تالان مسنے ۔ بھارت دنیا نا مون آ اسہ ہندو انتہاپسند فاشٹ ملک اسے نا وڑاٹ بے نقاب مسنے ۔ زرگزرانی ، سفارتی و دفاعی لحاظ اٹ سوگو پاکستان آن کشمیر نا ویل انا ایسری نا کسر آوار مریک ۔
