پاک فضائیہ ملک انا رکھ اکن ہروخت تیار ءِ، ہروڑنا جارحیت نا پبی ورندی ءِ ایتنہ، ایئر چیف مارشل مجاہد انور خان نا سرپرائز ڈے انا دود آن تران

اسلام آباد ۔ 27 فروری (اے پی پی) پاک فضائیہ نا سروک ایئر چیف مارشل مجاہد انور خان پارینے کہ تدوک آ سال 27 فروری آ پاک فضائیہ بھارتی فوج انا غرور ءِ مش تا کرے ، پاک فضائیہ ملک انا رکھ اکن ہروخت تیار ءِ ، ہروڑنا جارحیت نا پبی ورندی ءِ ایتنہ، کشمیری تا مخ تفی ءِ برجاتخنہ ۔ او پنچ شنبے نادے آ ایئر ہیڈ کوارٹرز سرپرائز ڈے انا دود آن تران کریکہ ۔ ترجمان پاک فضائیہ نا رداٹ اسلام آباد ایئر ہیڈ کوارٹر ز اٹی تاریخی دے آ مرکزی دود اس اڈتننگا، دود انا مہمان خاص ایئر چیف مارشل مجاہد انور خان ئس ۔ پاک فضائیہ نا ورناک دا وخت آ مارچ پاسٹ کریر و سلامی پیش کریر ۔ ایئر ہیڈ کوارٹر زاٹی مروک آ دود اٹی فلائی پاسٹ انا درشانی ءِ کننگا ۔ داوخت آ پاک فضائیہ نا جہاز آتا گھن گرج دشمن آ لڑزہ اس طاری کننگ والا ئسر ۔ دود آن تران کرسا پاک فضائیہ نا سروک ایئر چیف مارشل مجاہد انور خان پارے کہ پاک فوج انا گچین کارکڑد عشرہ غاتا خواری نا مرہون منت ءِ ۔ پاکستان ءِ چندی چیلنج آتا مون تروک ءِ، زرگزرانی ویل آتا سوب آن ٹیکنالوجی نا دوئی کننگ اٹ مشکلات ءِ ۔ اوپارے کہ پاکستان کشمیر نا اخلاقی و سفارتی مخ تفی ءِ برجاتخک ، نن ہر مشکل ساہت اٹی کشمیری ایلم تتون تفوک اُن ۔ مقبوضہ کشمیر اٹی بھارتی کرفیو ءِ چٹفنگے، بھارتی پروپیگنڈا نا مقابلہ ءِ کننگ آ میڈیا ءِ خراج تحسین پیش کینہ ۔ اوپارے کہ دشمن نا ہروڑنا نا جارحیت نا پبی ورندی ءِ تننگک ۔ پاک فوج انا شاہینک حب الوطنی نا جوزہ غان سرشار ءُ ۔ دود انا ایسر آ بشخ ہلوک آتے 27 فروری 2019ء نا مناسبت اٹ دستاویزی فلم اس نشان تننگا ۔ داہیت ذکر انا قابل ءِ کہ 27 فروری 2019ء آ کروک آ آپریشن سوءفٹ ریٹارٹ ءِ مدام یات تخنگک ۔ داہمودے ءِ ہراتم پاکستان بھارت نا نام نہاد بالاکوٹ سٹرائیک نا ورندی ٹی تینا مرضی اٹ جاگہ و وخت آ بھارت ءِ ورندی تسوسس ۔ آپریشن سوءفٹ ریٹارٹ نا بنالائن آف کنٹرول آن ایپار 6بھارتی فوجی ٹارگٹ آتا شست کننگ آن بناکرے ۔ ہراڑآ بھارت نا کنڈآن مگ21، ایس یو 30 و میراج 2000گدریفنگا، ہرافتے آن 2جہاز ءِ پاک فضائیہ نا شاہینک بھس کریر ۔ بھارتی مگ 21جہاز نا ملبہ پاکستانی علاقہ ٹی تما و اونا پائلٹ ابھی نندن دزگیر مس، وخت اس کہ بھارتی ایس یو 30 جہاز مقبوضہ کشمیر اٹی تمسا بھس مس، ہراٹی اونا پائلٹ ہم خلنگا ۔ بھارت دا شکست ءِ ڈکھنگ کن پاک فضائیہ نا ایف 16جہاز ءِ خلنگ و بٹنگ نا دعویٰ کرے، ہرادے او اینو ثابت کننگ کتنے وخت اس کہ امریکہ کمامدارآک ہم دادعویٰ نا نفی ءِ کرینو ۔