پاکستان امن نا خواہندار ءِ ولے کشمیر نا ویل آ ہچ ءُ سمجھوتہ اس کپک، صدر ڈاکٹر عارف علوی نا سیمینار آن تران

اسلام آباد ۔ 27 فروری (اے پی پی) صدر مملکت ڈاکٹر عارف علوی پارینے کہ بھارت اٹی سکھ، عیسائی و مسلمان تا زند ءِ ژند کننگانے، آر ایس ایس نا خار انگیز فلسفہ گاندھی ءِ ہم قتل کرے ۔ کشمیر برصغیر نا بشخ وپانٹ نا بے پورو ایجنڈا ءِ، پاکستان امن نا خواہندار ءِ ولے کشمیر نا ویل آ ہچ ءُ سمجھوتہ اس کپک، پاکستان نا سلہہ بند فوج اِرا بھارتی جہاز آتے بٹسا بھار ت نا غرور ءِ مش تا کرے ۔ داخیال آتا درشانی ءِ او داڑے پنچ شنبے نادے آ ’’شدت پسند بھارت و زموار پاکستان‘‘ نا سرحال آ سیمینار آن تران کرسا کرے ۔ صدر مملکت پارے کہ بھارت اٹی سکھ، عیسائی و مسلمان تا زند ءِ ژند کننگانے ، آر ایس ایس نا خار انگیز فلسفہ گاندی ءِ ہم قتل کرے ۔ اوپرے کہ پاکستان جمہوری تحریک و جمہوری قدر انا بنداو آ جوڑ مس ۔ کشمیر برصغیر نا بشخ وپانٹ نا بے پورو ایجنڈا ءِ ۔ اوپارے کہ اقوام متحدہ دنیا ٹی امن ءِ مون آ دننگ کن نظریہ نا رداٹ جوڑ مس ۔ بھارت اقوام متحدہ نا منشور ءِ ہم لتاڑک ۔ اوپاکستان اٹی دہشت گردی نا چٹفنگ اٹی سرسہبی آ سلہہ بند فوج ءِ خراج تحسین پیش کرسا پارے کہ پاک فضائیہ اِرابھارتی جہاز آتے بٹسا بھارت نا عددی اکثریت نا زعم ءِ مش تا کرے و پاکستان ثابت کرے کہ چنکو ملک اس مننگ آن پد ہم ننا دفاعی لاءخی کیہی گنا گچین ءِ ۔ اوپارے کہ بھارت سری لنکا، نیپال و ایلو چنکا ہمسایہ ملک آتا تہہ نا باندات آتے ٹی ہم نیام تمنگ ءِ ۔ اوبھارت نا ساڑی آ تہہ نا حالیت آتا ذکر ءِ کرسا پارے کہ دا حالیت آک خوشنونت سنگھ انا 2003ء ٹی شینک مروک آ کتاب’’بھارت نا چٹفنگ‘‘ اٹ پاروک آحالیت آتون مماثلت تخک ۔ اوپارے کہ ای بھارت نا تہہ نا حالیت آتیان جوانی اٹ بلد اُٹ ۔ اوپارے کہ پاکستان مچ آ دنیا ٹی اقلیت آتا حق انا علمبردار ءِ ۔ اوپارے کہ بھارت اٹی اقلیت آک زور انا گواچی ءُ ۔ بھارت نا تہہ نا حالیت آتیا ڈکھ مریک ۔ بھارت ڈیہہ ٹی امن نا غٹ کوشست آتے زیان کرینے ۔ اوپارے کہ 10 سال آن بھارت سارک سسروک دیوان اٹی بشخ ہلتنے ۔ بھارت اٹی اقلیت آتے اوفتا حق دوئی اف ۔ مسلمان تا آبادی نا تناسب آن پارلیمان اٹی اوفتا نمائندگی بھاز کم ءِ ۔ اوتینا حق انا رکھ ءِ کننگ کپسہ ۔ اوپارے کہ پاکستان امن نا خواہندار ءِ ولے کشمیر نا ویل آ ہچ ءُ سمجھوتہ اس کپک ۔