اسلام آباد۔ 26 فروری (اے پی پی) وزیراعظم عمران خان بھارتی جارحیت نا زموارانہ و پبی ورندی ءِ تننگ نا اسہ سال پورو مننگ نا وخت آ اڈ ہلوک آ دود انا مہمان خاص مریک۔ مقبوضہ کشمیر اٹی پلوامہ واقعہ غان پد پاکستان بھارت تون ہروڑکمک کرے، پاکستان تینا دا عزم انا درشانی ءِ کرے کہ او ڈیہہ ٹی جنگ آخا امن خواہک ولے پاکستان پیدوار کرے کہ ہروڑنا جارحیت نا موکل تفننگک و جلہو گیر ءِ پبی ورندی تننگک۔ داکان پد ہم 26 فروری 2019ء آ بھارت نا کنڈآن پاکستان نا چاگڑدی دنگ انا خلاف ورزی ءِ کننگا و پاکستانی علاقہ نا تہہ ٹی برسا ہوائی جلہو کننگا پاکستان نا کنڈآن بھارتی جارحیت نا برخلاف تینا موثر دفاع نا عزم آ عمل کرسا پاک فضائیہ دوبھارتی جنگی جہاز آتے خلک بٹے و اسہ بھارتی پائلٹ ونگ کمانڈر و ابھی نندن ورتھمن ءِ دزگیرکرے۔ دا مچ آ تنکی ٹی پاکستان نا سلہہ بند فوج پورو وڑاٹ چوکس ئس و انٹرسروس ہم آہنگی نا بڑزکو درجہ تون کاریم کرے۔ داوخت و پاس اٹی پاکستان ثابت کرے کہ او اسہ قوم و اسہ روح ءُ۔ دانا شاری و عسکری سرکڑدہ وقار اتون امن و بے کچ زمواری نا شاہدی تسر۔ امن نا است خواہی نا رداٹ پاکستان دزگیر پائلٹ ابھی نندن ءِ طبی آسراتی فراوان کرے و اوڑتون تینا روایتی مہمانداری نا برتاؤ کرے وخت اس کہ رضاکارانہ وڑاٹ اودے بھارتی کمامدارآتا حوالہ کرے۔ دا مچ آ عمل اٹ پاکستان نا دا عزم انا درشانی مریک کہ لمہ وطن آ جارحیت ءِ سگنگ پننگک۔ پاکستان نا سلہہ بند فوج ہروڑنا جارحیت اتون مون تننگ نا پورو لائخی تخک و پورو وڑاٹ تیار ءِ۔ پاکستان مدام ڈیہہ ٹی امن نا خواہندار ءِ و ڈیہہ نا امن ءِ رکھ کننگ نا کسر آ سلوک ءِ۔ بھارت تون امن نا است خواہی ءِ پاکستان نا نزوری تکنگپ بلکن دا گام ڈیہہ نا الس ءِ نیزگاری آن کشنگ، اوفتا شونداری و شونہالی نا رداٹ بایدے ہُننگے۔ پاکستان امن نا شریدار ءِ واونا تزویراتی اہمیت ءِ گوجالنگ مفک۔
