اسلام آباد۔ 26 فروری (اے پی پی) وزیر خارجہ مخدوم شاہ محمود قریشی پارینے کہ بھارتی میڈیا صدر ٹرمپ انا پریس کانفرنس ءِ تینا مسخت آتے کن کاریم اٹ اتنگ نا کوشست کرے ولے صدر ٹرمپ دہشت گردی نا برخلاف پاکستان نا کوشست آتا ستاءِ کرے، پاکستان اسہ وخت اسے آن پارسا بننگ ءِ کہ بھارت اٹی مسلمان بے رکھ انا گواچی ءُ۔ چارشنبے نادے آ وزارت خارجہ نا کنڈآن جاری بیان اٹی وزیر خارجہ شاہ محمود قریشی پارے کہ تدوک آ اِرادے آن دہلی ٹی دہ آن زیات بندغ زوا ل کرینو، ماڑی تے خاخر تننگ انگ ءِ، پیٹرول پمپ و کاروباری ہند آتے خاخر تننگ انگ ءِ، دنیا دا حالیت آتا دمدستی بایدے نوٹس ہلے۔ اوپارے کہ صدر ٹرمپ ہزار آ خلقت نا ساڑی گری ٹی پیدوار لوز آتے ٹی پارینے کہ عمران خان کنا سنگت ءِ و پاکستان گچین حکمت عملی اٹ دہشت گردی ءِ شکست تسونے۔ صدر ٹرمپ وزیراعظم عمران خان تون کروک آ وعدہ نا رداٹ کشمیر نا بابت آن بھارتی وزیراعظم تون ہیت کرینے۔ مقبوضہ جموں وکشمیر نا گڑتی حالیت آک و مچ آ دنیا نا ردعمل ءِ مون آ تخسا صدر ٹرمپ انا کنڈآن وار وار ثالثی نا سلہ بھارتی بیانیہ نا نفی ءِ۔
