پاک بحریہ ہروڑنا جارحیت نا ورندی ءِ تننگ کن ہروخت تیار ءِ
اسلام آباد۔ 26 فروری (اے پی پی) امیر البحر ایڈمرل ظفر محمود عباسی کریکس کون آ پیچیدہ علاقہ نا سیکورٹی نا بابت آن گام گیج آتا ستاءِ کرسا پارینے کہ پاک بحریہ ہروڑنا جارحیت نا ورندیءِ تننگ کن ہروخت تیار ءِ۔ او سی سپارک 2020ء ٹی مشق انا کمانڈ سینٹر نا دورہ ءِ کننگ نا وخت آ گپ و تران کریکہ۔ ترجمان پاک بحریہ نا رداٹ کمانڈر کراچی وائس ایڈمرل زاہد الیاس کمانڈ سینٹر آ بننگ آ نیول چیف ءِ بخیر کرے و امیر البحر ءِ حوال تننگا۔ اوکان پد نیول چیف کریکس ایریا و مون نا مورچہ غاتا دورہ ءِ کرے۔ دورہ ءِ کننگ نا مسخت مشق سی سپارک نا رداٹ آپریشنل تیاری و کوسٹل کمانڈ نا آپریشنل پلان تا جاچ ءِ ہلنگ نا ئس۔ شاہ بندر آ بننگ آ کمانڈر کوسٹ وائس ایڈمرل فیصل رسول لودھی نیول چیف ءِ بخیر کرے۔ نیول چیف ءِ مشق سی اسپارک اٹی آپریشنل سرجزو و میرات آتا تعیناتی نا بابت آن سرجم حوال تننگا۔ امیر البحر کریکس کون آ پیچیدہ علاقہ نا سیکورٹی نا بابت آن گام گیج آتا ستاءِ کرے و پارے کہ پاک بحریہ ہروڑنا جارحیت نا ورندی ءِ تننگ کن ہروخت تیار ءِ۔ دورہ ٹی نیول چیف کریکس ایریا ٹی تعینات آفیسر و ورناتے تون اوڑدہی کرے و اوفتا عزم انا ستاءِ کرے۔
