اسلام آباد۔ 26 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ مودی نا انتہاپسند متعصبانہ نظریہ عمران خان نا امن نا سوچ آن شکست کُنگن ءِ، صدر ٹرمپ انا بیان پاکستان ءِ دہشت گردی تون گنڈنگ نا مذموم بھارتی کوشست آکاری ءُ دک اسے، مودی سلہہ غاتا انبار و بارود آتا ڈھیر اس ہلسا ہم عمران خان نا سرسہب سفارتکاری نا مون آ بے وس خننگ انگ ءِ۔ خصوصی کمکار ڈاکٹر فردوس عاشق اعوان تینا ٹویٹ اٹی پارے کہ کشمیری تیا ظلم جہانی ضمیر ءِ سرفینے، ٹرمپ انا بیان شاہدی ءِ کہ کشمیر اسہ مسلمہ جہانی جھیڑہ سے، ناحق خون آ مچ آ دنیا نا توار بڑز کننگ ستاکڑزک۔ ڈاکٹر فردوس عاشق اعوان پارے کہ جہانی برادری سلامتی کونسل نا قرارداد و کشمیری الس نا است خواہی تار داٹ اوفتا جمہوری و کانودی حق ءِ ترفے، ہندوستان”ہندتوستان“ اٹ بدل مسنے۔ اوپارے کہ صدر ٹرمپ انا ساڑی گری ٹی مسلمان تیا بہیمانہ بیدادی و کشت وخون بھارتی سرکڑدہ نا انتہاپسند و مجرمانہ سوچ ءِ مچ آ دنیا غا پاش کننگ ءِ وخت اس کہ وزیراعظم عمران خان نا کماشی ٹی پاکستان نا مچ آ دنیا ٹی پرامن و رواداری آ مبنی راج انا تاثر بڑزا بننگ ءِ۔
