وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا جاپان کراٹے ایسوسی ایشن آف پاکستان نا کنڈآن ایجوکیشن ورکشاپ آن تران

اسلام آباد۔ 26فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا بیانیہ شون ہلوک و روشنا پاکستان نا بیانیہ ءِ، امریکی صدر ڈونلڈ ٹرمپ بھارتی گل زمین آ سلسا دہشت گردی نا برخلاف پاکستان نا کڑد انا ستاءِ کرینے، صدر ٹرمپ انا بیان سفارتی بابت آن بے کچ اہمیت تخک، صدر ٹرمپ انا بیان آن مودی نا خار و تعصب آ مبنی بیانیہ ءِ شکست مس، ملک اٹی اولیکو وار اسہ وڑنا نصاب نافذ کننگ والا اُن، گوازی تے نصاب نا بشخ جوڑ کننگک، مارشل آرٹس جسمانی سوگوی و تندرستی کن المی ءِ، ورناک جسمانی و ذہنی وڑاٹ سوگو مریر، وزیراعظم عمران خان تینٹ اسپورٹس مین اسے، گوازی تا مون آ دننگ اٹ بھاز است خواہی تخک، وزیراعظم گوازی تا بشخ اٹ اصلاحات درستی راستی کرفنگ خواہک، کراٹے کون آ گوازی تیٹی مسن تا اوار مننگ ستاکڑزک، پاکستانی مسنک لائخی تا بابت آن ہچ کس آن کم افس۔ داخیال آتا درشانی ءِ او چارشنبے نادے آ پاکستان سپورٹس بورڈ اسلام آباد اٹی جاپان کراٹے ایسوسی ایشن آف پاکستان نا کنڈآن شش میکو جے کے نیشنل کراٹے کیمپ انا سرحال آن ایجوکیشن ورکشاپ آن تران کرسا کرے۔ ورکشاپ اٹی اسکول نا چناتے تون اوار کراٹے ایسوسی ایشن پاکستان نا باسک آک و عہدیدار آک بھلو کچ اسے ٹی ساڑی ئسر۔ دود آن تران کرسا خصوصی کمکار پارے کہ کراٹے ایسوسی ایشن ملک اٹی کراٹے ءِ مون آ دننگ و گچینی کن نئے بیرہ کاریم کننگ ءِ بلکن جان جوڑراج انا بنداو ءِ تخنگ اٹ ہم کلیدی کڑد ادا کننگ ءِ۔ اوپارے کہ مارشل آرٹس جسمانی سوگوی و تندرستی کن المی ءِ۔ ورناک جسمانی و ذہنی وڑاٹ سوگو مریر۔ اوپارے کہ کراٹے ہندن ءُ گوازی اسے ہراکہ نظم و ضبط ہیل ایتک و پدریسہ سلسا آخیریکو ساہ اسکان مقابلہ نا لائخی ءِ ہیل ایتک۔ کراٹے جسمانی نشوونما و فزیکل فٹنس اٹ کمکار و آسراتی ایتک۔ اوپارے کہ اعصاب نا جنگ ءِ ہمو کٹک ہرا چنکی آن گوازی تتون گنڈوک مریک۔ ڈاکٹر فردوس عاشق اعوان پارے کہ وزیراعظم عمران خان نا بیانیہ شون ہلوک و روشنا پاکستان نا بیانیہ ءِ، وزیراعظم عمران خان تینٹ اسپورٹس مین اسے، گوازی تا مون آ دننگ اٹ بھاز است خواہی تخک، وزیراعظم گوازی تا بشخ اٹی اصلاحات درستی راستی کرفنگ خواہک۔ گوازی ملکی آبادی نا 65 درسد ورنا تا جان جوڑ سرجزءِ و ہر گوازی ٹی زالبول گوازی گر تے ہم اسہ وڑ وارخواہی ملک۔ اوپارے کہ کراٹے کون آ گوازی تیٹی مسن تا اوار مننگ ستاکڑزک۔ پاکستانی مسنک لائخی نا بابت ہچ کس آن ہم افس۔ خصوصی کمکار پارے کہ ملک اٹی اولیکو وار اسہ وڑنصاب اس نافذ کننگ والا اُن۔ اوپارے کہ جاپان سفارتخانہ نا منت واراُن کہ او داوڑنا ورکشاپ اس کرے۔ جاپان اٹی مروک آ اولمپکس گیمز اٹی 5اتھیلٹس نا اوار مننگ پاکستانی گوازی گرتا لائخی نا شاہدی ءِ۔ داوڑنا ایونٹ آک پاک جاپان رابطہ غاتا مون آ دننگ اٹ اہم ءُ کڑد اس دا کیرہ۔ اوپارے کہ وزیراعظم عمران خان نا کنڈآن چناتے باور کرفیوہ کہ گوازی تے نصاب نا بشخ جوڑ کننگک تانکہ چناتا ذہنی نشوونما ہم مننگ کے۔ اوپارے کہ حکومت اولیکو وار نیشنل ایجوکیشن پالیسی نا رداٹ اولیکو کلاس آن 5می کلاس اسکان گوازی تے نصاب نا بشخ جوڑ کننگک و صوبائی حکومت ہم گوازی تے نصاب اٹ اوار کیر و داڑتون اسہ وڑ تعلیمی نظام اس ہم نافذ کننگ اُن۔ پاکستان اٹی ٹیلنٹ نا ہچ کمتی اف۔ بیرہ اودے مون آ اتنگ نا گرج ءِ۔ اوپارے کہ جہانی کہول آ پاکستان نا بیرک ءِ چست کننگ نا ہچ ءُ بدل اس اف۔