پاکستان اٹی امریکی زرکار آک زرکاری نا خاطرخواہ وارخواہی تیان پبی فائدہ ہرفر، سلاہکار واپار و ٹیکسٹائل عبدالرزاق داؤد

اسلام آباد۔ 26 فروری (اے پی پی) وزیراعظم نا سلاہکار واپار و ٹیکسٹائل عبدالرزاق داؤد پارینے کہ پاکستان اٹی امریکی زرکارآتے کن زرکاری نا خاطر خواہ وارخواہی ارے ہرافتیان پبی فائدہ ہرفنگے وخت اس کہ امریکی وزیر واپار ولبر راس پارینے کہ امریکی کمپنیک پاکستان اٹی تینا زرکاری ءِ ودفنگ نا خواہندار ءُ۔ داخیال آتا درشانی ءِ ہڑتوم آک چارشنبے نادے آ داڑے اوڑدہی ٹی گپ وتران کرسا کریر۔ اوڑدہی ٹی ہڑتوم آ کنڈآتا واپار و زرکاری ءِ ودفنگ نا وارخواہی تیا گپ و تران کننگا۔ سلاہکار واپار امریکی وزیر واپار ءِ برآمد ات و کاروبار ءِ مون آ دننگ کن ساڑی حکومت نا کنڈآن چست کروک آ گام گیج آتیان معلومدار کرسا پارے کہ حکومت ملک اٹی برآمدی سرجز آتے ٹی ودکی کن برآمد کنندگان آتے آسراتی فراوان کننگ ءِ۔ داڑتون اوار اوار کاروبار کن سازگار چاگڑد نا فراوانی کن خصوصی گام گیج کننگ انگ ءِ۔ عبدالرزاق داؤد پارے کہ پاکستان اٹی امریکی زرکارآتے کن زرکاری نا خاطر خواہ وارخواہی ارے۔ امریکی پوریاگر و صنعت کار آک داحالیت آتیا ن فائدہ ہرفر۔ اوپارے کہ حکومت زرکاری ءِ مون آ دننگ کن زرکار آتے جوان ءُ مراعات تننگ ءِ۔ امریکی وزیر واپار ولبر راس پارے کہ چندی امریکی کمپنی پاکستان اٹی تینا زرکاری ءِ ودفنگ نا خواہندار ءُ۔ اوپارے کہ امریکہ پاکستان نا جوڑ جاڑ و شونداری ٹی پبی کڑد ادا کننگ خواہک، پاکستان ءِ امریکہ تون اواری اٹ ہڑتوم آ کنڈآتا واپاری کچ ءِ ودفنگ نا گرج ءِ۔ وزیراعظم نا سلاہکار پارے کہ پاکستانی مصنوعات آتا بھلو کچ اس امریکہ آن دوئی جی ایس پی آسراتی آن مستفید افس، ٹیکسٹائل تون اوار دا مصنوعات آتے ہم اولیتی واپاری آسراتی فراوان کننگے۔ اوپارے کہ امریکی کمپنیک پاکستان اٹی تینا مصنوعات آتے تیار کرسا ایلو منڈی تے برآمد کننگ کیرہ داڑآن پاکستان ءِ امریکی کمپنی تا آزموندہ نا گدریفنگ آن فائدہ دوئی کننگ نا وارخواہی ملک۔