اسلام آباد۔ 25 فروری (اے پی پی) وزیر خارجہ شاہ محمود قریشی پارینے کہ ڈیہہ ٹی امن و سوگوی ہمو دروشم اٹ مننگ کیک ہراتم کشمیر نا ویل ایسر مریک۔ بھارت نا ساڑی حکومت تنازعہ ءِ پین پیڑفینے، صدر ٹرمپ بھارت ءِ پارینے کہ او امن و سوگوی ءِ مون آ دننگ کن دوتے مریفے۔ وزارت خارجہ نا کنڈآن جاری بیان نا رداٹ داخیال آتا درشانی ءِ او امریکی صدر نا دورہ بھارت نا بابت تینا بیان اٹی کرے۔ اوپارے کہ کشمیر نا اہمیت آن ہچ کس نمن مننگ کپک۔ صدر ٹرمپ پارینے کہ او دا ڈیہہ ٹی امن و سوگوی خواہک۔ اوبھارت آ زور شاغانے کہ او دا ڈیہہ ٹی مثبت کڑد ادا کے و امن و سوگوی ءِ مون آ دننگ کن تینا دوتے مریفے۔ وزیر خارجہ شاہ محمود قریشی پارے کہ ڈیہہ ٹی امن و سوگوی ءِ مون آ دننگ کن دیرینہ کشمیر نا ویل انا ایسری المی ءِ۔ بھارت نا ساڑی حکومت دا پیچیدہ ویل ءِ پین خراب کرینے۔ اوپارے کہ بھارت نا پنچ اگست نا گام گیج کشمیر نا دروشم ءِ زہمی کرینے و اودے بشخ آتے ٹی بشخانے، 206دے مسنے مقبوضہ کشمیر اٹی لاک ڈاؤن ءِ۔ داحالیت آتے ٹی ہیت امر مون آ مریک۔ بھارت دا شعر خلسا کرینے کہ آجوئی کن کشمیری تا جہد ہندی اف۔ صدر ٹرمپ باور کرفینے کہ پاکستان دہشت گردی نا برخلاف جنگ اٹی امن نا شریدار ءِ۔ پاکستان دہشت گردی ءِ شکست تننگ اٹ ہرا پیش رفت کرینے او دنیا ٹی اسہ مثال اسے۔ اوغانستان اٹی امن و سوگوی نا بابت ہم پاکستان نا کڑد غٹ انا مون آٹے۔ اوپارے کہ ہمو پاکستان ہرادے بھارت اسہ ویل اس پاریکہ اینو دنیا اودے اسہ ایسر اسے نا وڑاٹ ہُننگ ءِ۔ ڈیہہ ٹی پاکستان نا ہرا کڑد ءِ اونا ستاءِ کننگ انگ ءِ و ہرا پاکستان پارے کہ متنازعہ شہریت کانود نا سوب آن بھارت اٹی خلفشار ءِ اونا عملی درشانی ءِ اوتینٹ خنا کہ داوخت آ دہلی نا حالیت آک انت ءُ۔ کنے یخین ءِ کہ صدر ٹرمپ دورہ بھارت اٹی کشمیر نا ویل آ ضرور ہیت کیک۔ صدر ٹرمپ ءِ کشمیر نا ویل آ گڑتی ءِ۔ وزیر خارجہ پارے کہ صدر ٹرمپ سمجھک کہ دو ایٹمی قوت مون پہ مون ءُ۔ اگہ بگاڑ ودی مریک تو امن نا خلل مچ آ دنیا ءِ زہمی کننگ کیک۔ صدر ٹرمپ پارے کہ امریکہ نا پاکستان تون تعلقداریک بھاز جوان ءُ۔ ہراتم نن حکومت اٹ بسون تو ہڑتوم آ ملک آتا نیام اٹ تعلقداری ٹی سردمہری ئس۔ تعلقداری تیٹی تناؤ ئس ساؤتھ ایشیا سٹریٹجی نا پڑو مسوسس۔ پاکستان ءِ اسہ ویل اس سرپند کننگاکہ ولے اینو ہراخوشگوار بدلی بسنے اوڑآ ای مچ آ قوم، پاکستان نا فوج و سیاسی سرکڑدہ غاتے مبارکبادی ایتیوہ۔
