اسلام آباد۔ 25 فروری (اے پی پی) چین نا پاکستان اٹی سفیر یاؤجنگ وزیر ریلوے شیخ رشید احمد تون اوڑدہی کرے ہراٹی پاکستان و چین نا نیام اٹ جاری ریل ڈٹ آتیا گپ و تران مس، ڈٹ آتیا کاریم نا رفتار ءِ پین ترند کننگ آامنا کننگا۔ اوڑدہی ٹی سیکرٹری /چیئرمین ریلوے حبیب الرحمان گیلائی ئسک ہم ساڑی ئسر۔ بنجائی وزیر ریلوے شیخ رشید احمد چین اٹی کورونا وائرس آن مروک آ زوال تیا چینی سفیر تون ہمدردی نا درشانیءِ کرے۔ وزیر ریلوے پارے کہ دا مشکل وخت اٹی پاکستانی الس و حکومت چین اتون سلوک ءُ۔ اوپارے کہ ما رچ اٹی وزارت پلاننگ آن منظوری آن پد پشاور۔کراچی مین لائن ون (ایم ایل ون) ڈٹ اینخو مالی سال اٹی ہی بناکیک۔ اوایم ایل ون ڈٹ اٹی بھاز است خواہی آ چینی سفیر نا منت واریءِ ہرفسا پارے کہ کراچی سرکلر ریلوے نا بحالی کن ہم گام گیج آتے ترند کننگک۔ شیخ رشید احمد پارے کہ سپریم کورٹ آف پاکستان نا ہم است خواہی ءِ کہ ایم ایل ون ڈٹ و کے سی آر نا بحالی زوت آ ن زوت ممکن مرے، داڑکن چین اتون اواری اٹ المی گام گیج کینہ۔ اوپارے کہ 1800 کلومیٹر ایم ایل ون ڈٹ آ کم و ود نہہ ارب ڈالر خڑچ بریک، پنچ سال اٹی پورو مریک، ایم ایل ون ڈٹ پاکستان ریلوے و ملکی زرگزران کن بے کچ اہم ءِ۔چینی شریداری آن پاکستان اٹی ریل انا نقشہ بدل مریک۔ چینی سفیر پارے کہ پاکستان نا اقتصادی شونداری کن روڈ و ریل انفراسٹرکچر ءِ ترندی اٹ شون تننگ المیءِ۔ داچرجوئی ٹی پاکستان ریلوے تون پورو کمک کینہ۔ اوپارے کہ پاکستان و چین غٹ حالیت آتے ٹی اسہ ایلو تون سلوک ءُ۔
