گلگت۔ 25 فروری (اے پی پی) اے آئی جی سی ٹی ڈی آپریشنل گلگت بلتستان حفیظ الرحمان گلگت اٹی میڈیا تون گپ وتران کرسا پارینے کہ گلگت نا چندی علاقہ غاتے ٹی سی ٹی ڈی آپریشنل ٹیم تا سرسہب کارروائی تیٹی چندی درکار دوبہ دار آتے دزگیر کننگانے۔ شام انا وخت ءُ پاس اٹ گن پوائنٹ آ شاری و مسافر آتے پلوک آ رڑ ءِ دزگیر کرسا اوفتا تحویل آن نغدی، موبائل فون، سلہہ و ایلو نہادی گڑاتے دوئی کرسا جاست وپاست نا بناءِ کرینو۔ اوپارے کہ بنائی جاست وپاست اٹی دزگیر دوبہ دار آک سنسنی خیز و دلچسپ انکشاف کرینو ہرا فتے بھاز زوت میڈیا نا مون آ اتنگک۔ بین الصوبائی رڑانا ساڑی آ دے تیٹی نگر چھلت اٹی گن پوائنٹ آ شاری و مسافر آتے پلنگ نا ہم شبہ ظاہر کننگ انگ ءِ، بین الصوبائی رڑنسیم سینما چوک رمضان ہوٹل نا گلی ٹی ساڑی تندورچی آن نغدی و موبائل، عسکری بینک گلی نا تندورچی آن نغدی و موبائل فون، کنوداس ایریا ٹی گن پوائنٹ آ دوکاندار آن نغدی و موبائل فونز، جوٹیال ذوالفقار ابادروڈ اٹی گن پوائنٹ نا کمک اٹ نغدی و ایلو نہادی گڑا، جوتل سوسائٹی دفتر آن داڑیلی نا کمک اٹ ہزار آ مالیت نا گڑا و نغدی و گلگت نا ایلو ایب وکیب نا علاقہ غاتیان ہم سلہہ نا زور آ کیہی شاری و مسافر آتیان لکھ آ مالیت نا گڑا و نغدی پلسا نراسر۔ اوپارے کہ رڑاٹی دیامر، نگر، گلگت، سکارکوی، ڈومیال نا مارک اوار ءُ ہرافتا پیدواری آ ایلو سنگت آتا دزگیری کن پولیس ٹیم تے تشکیل تننگانے۔ اے آئی جی سی ٹی ڈی مستی پارے کہ سی ٹی ڈی آپریشنل ٹیم سب انسپکٹر شیر عالم و سب انسپکٹر سہراب احمد نا کماشی ٹی کریک ڈاؤن کرسا چاردے اٹی ہشت نروک خطرناک اشتہاری دوبہ دارآتے دزگیر کرسا تعلقدار تھانہ غاتا حوالہ کرینے۔ اوپارے کہ ہڑتوم آ آپریشنل ٹیم تا گچین کارکڑد آ آئی جی پی گلگت بلتستان ڈاکٹر مجیب الرحمان نغدی تتون اوار اے کلاس سرٹیفکیٹ وخت اس کہ تینا کنڈآن ہڑتوم آ آپریشنل ٹیم تے نغد دہ ہزار روپئی تون اوار تھری کلاس سرٹیفکیٹ تننگ نا پڑو ءِ کرینے۔ اوپارے کہ شاری تا ہم فرض مریک کہ او سیکورٹی ادارہ غاتون پورو کمک کیر تانکہ امن و ایمنی و الس نا جان و مال انا رکھ ءِ پک کننگ کن مستی گام گیج کننگ مرے۔
