اسلام آباد۔ 24 فروری (اے پی پی) بنجائی وزیر بجلی و پٹرولیم عمر ایوب خان پارینے کہ توانائی نا بشخ اٹی متکن آ ٹیکنالوجی چلینگ انگ کپک، ننے دا بشخ انا گچینی کن پوسکن آ ٹیکنالوجی نا کنڈآ ہنوئی تمک، انرجی مکس ءِ بدل کننگ اُن، مستین اٹی بجلی نا ہل و تس انا کبین ءُ معاہدہ کننگا، توانائی نا ودوک آ طلب ءِ پورو کننگ کن گام گیج کننگ انگ ءِ، 2030 ء اسکان گیگ بدل توانائی آن پیدوار ءِ ودفنگک۔ اوداخیال آتا درشانی ءِ دوشنبے نادے آ داڑے نیپرا نا کنڈآن ہفتہ توانائی نا دود آن تران کرسا کرے۔ عمر ایوب خان پارے کہ ملک انا گچین آخبت و پائیدار اقتصادی شونداری کن اڑزان انگا توانائی نا فراوانی المی ءِ و اینو نا دور صاف توانائی نا دور ءِ۔ مستین اٹی بجی نا ہلنگ نا کبین ءُ معاہدہ کننگا۔ اوپارے کہ اینو نن 75 درسد بجلی ہرافتے کاریم اٹ اتنگ اُن۔ دانا سیبو درآمدی ایندھن آٹے ہراڑآ دانا روپئی آ قدرآتمک و درآمدی بل ہم ودک۔ اوپارے کہ حکومت داسہ دا ویل آتون مون تننگ کن گام گیج کننگ ءِ۔ انرجی مکس اٹی گیگ بدل ذرائع اٹ بجلی نا پیدوار ءِ ودفوئی مریک۔ 2025ء اسکان نن دادے 20 درسد و 2030ء اسکان 30 درسداسکان دینہ و 70 آن 80 درسد بجلی ملکی وسیلہ غاتیان ودی کننگک۔ اوپارے کہ پوسکن آ کمپنیک داسہ پاکستان آ بننگ ءُ و اولیکو وار بجلی نا طلب نا تجزیہ سائنسی بنداو تیا کننگ انگ ءِ ہرا ٹیکنالوجی داوخت آ کنتون ءِ او داسہ متکن مسنے۔ ننے پوسکن آ ٹیکنالوجی نا کنڈآ ہنوئی مریک۔ بجلی نا پیدوار نا بشخ اٹی 40 ارب ڈالر، بجلی نا ترسیل نا بشخ اٹی 20 ارب ڈالر و بشخنگ نا بشخ اٹی 15آن 20 ارب ڈالر نا زرکاری نا گنجائشت ساڑی ءِ و کٹیا نا واپسی نا زیات شرح و زیات آبادی نا سوب آن پاکستان اٹی زرکار آتا رجحان ودسا ہِننگ ءِ۔ اوپارے کہ ننا 18 غان 20 درسد زرگزران غیر دستاویزی ءِ ہرانا حجم روایتی جی ڈی پی 300 ارب ڈالر آن پد 600 ارب ڈالر جوڑ مریک وخت اس کہ سعودی عرب نا جم اٹنگا جی ڈی پی 850 ارب ڈالر ءِ۔ اوپارے کہ ننے ودوک آ توانائی نا طلب ءِ پورو کننگ کن دا بشخ اٹی پین زرکاری ءِ مون آ دروئی مریک۔
