کوئٹہ۔ 24 فروری (اے پی پی) گورنر بلوچستان امان اللہ خان یاسین زئی پارینے کہ بولان یونیورسٹی آف میڈیکل اینڈ ہیلتھ سائنسز ننا اولیکو میڈیکل یونیورسٹی ءِ۔ ہنداخاطرآن دادے منٹ منٹ آ بدلینگوک آ دنیا نا پوسکن آ خواست آتون ہم گرنچ کننگ کن کارکڑد اٹ ترند رفتار اتنگ و چست کروک آ گام گیج آتا بھرم آتے ٹیچنگ فیکلٹی و خوانوک آ طالب علم آتسکان سرکننگ کن پبی گام گیج کے۔ گورنر پارے کہ فنڈ آتا وخت آ جاری کننگ آن بولان میڈیکل یونیورسٹی نا کیہی مشکل آک دمدستی وڑاٹ ایسر مریرہ۔ گورنر پیدوار کرے کہ گونڈ و مریس مد تخوک آ ہدف آتا دوئی کننگ اٹ ڈیوالائی ءِ سگپنہ۔ داہیت ءِ او وائس چانسلر بولان میڈیکل یونیورسٹی پروفیسر ڈاکٹر نقیب اللہ اچکزئی نا کنڈآن حوال اٹی پارے حوال اٹی بولان میڈیکل یونیورسٹی نا کارکڑد، مون تروک مشکلات فنڈ آتا جاری،امتحان تا وخت آ اڈتننگ تون اوار یونیورسٹی نا مالی و انتظامی باندات و معاملہ غاتیا سجفیر۔ وائس چانسلر ڈاکٹر نقیب اچکزئی گورنر بلوچستان ءِ یونیورسٹی ٹی واکداری تا بشخنگ، تعینات و پروموشن تون اوار ایلو باندات ومعاملہ غاتا بابت چندی کمیٹی تا جوڑ کننگ آن ہم معلومدار کرے۔ گورنر غٹ تعلقدار زموار آتیا زور شاغا کہ او یونیورسٹی نا آب ءِ بڑزکننگ جان جوڑ تعلیم چاگڑدءِ مون آ دننگ و مون تروک ویل آتا پائیدار ایسری کن تینا بشخ انا کڑد ءِ ادا کیر تانکہ ننا بروک آ چین تے ہم رکھ ملنگ کے۔
