کوءٹہ ۔ 21 فروری (اے پی پی) وزیراعلیٰ بلوچستان جام کمال خان تون چیئرمین ٹیکنیکل ایڈوائزری پڑک پولیو تدارک ڈاکٹر جان مارک اولیور تینا ٹیم اتون اوار جمعہ نادے آ داڑے اوڑدہی کرے ۔ اوڑدہی ٹی بلوچستان اٹی پولیو نا توننگ و تدارک کن گام گیج آتیا گپ و تران کننگا، داوخت آ گپ وتران کرسا وزیراعلیٰ پارے کہ حکومت بلوچستان پولیو نا ویل ءِ اسہ بھلو چیلنج اسے نا وڑاٹ ہلکونے و داڑتون گچین وڑاٹ مون تننگ کن یونیسیف نا شریداری اٹ پبی گام گیج ہم کننگ انگ ءِ ولے وزیراعلیٰ نا پاننگ ئس کہ او داہیت آ باور کیک کہ پولیو نا ویل مصنوعی گام گیج یا بیرہ عکس ہلنگ آتے اٹ ایسر مفک بکن داڑکن آخبتی نظام و سوگو ءُ حکمت عملی اسے نا گرج ءِ ، اوپارے کہ معمول نا رکھی ٹیکہ جاتی نظام ءِ گچین بنداو تیا استوار کرسا چناتے پولیو تون اوار ایلو موذی مرض آتیان رکھ کننگ مریک وخت اس کہ بنداوی ہند جان جوڑی ٹی آخبتی بنداو تیا ویکسینٹر نا تعیناتی و ویکسین نا دستیابی آن ہم درکار نتیجہ غاک دوئی مننگ کیرہ ، دارداٹ صوبائی حکومت ڈٹ بندی کننگ ءِ ہراڑکن یونیسیف و ایلو رضاکار آتا کمک نا خیرمقدم ءِ کننگک ۔ وزیراعلیٰ پارے کہ جان جوڑی نا بشخ اٹی جاری عمودی پروگرام نا مانیٹرنگ کن اسہ جتا ءُ ایڈیشنل ڈائریکٹر جنرل جان جوڑی نا تعیناتی ءِ کننگانے ، ڈاکٹر جان وزیراعلیٰ نا موقف آن امنا کرسا باوری کرفے کہ رکھی ٹیکہ غاتا نظام ءِ سوگو کننگ کن صوبائی حکومت تون پورو کمک کننگک، سیکرٹری جان جوڑی مدثر وحید ملک و کوارڈنیٹر ایمرجنسی آپریشن سینٹر بلوچستان راشد رزاق ہم اوڑدہی ٹی ساڑی ئسر ۔
