کوءٹہ ۔ 21 فروری (اے پی پی) وزیراعلیٰ بلوچستان جام کمال خان تون وزیراعظم نا خصوصی کمکار معدنی ترقی و مارکیٹنگ شہزاد سید قاسم داڑے اوڑدہی کرے ۔ ڈائریکٹر جنرل منرلز وزارت توانائی محمد اقبال ہم داوخت آ ساڑی ئس ۔ اوڑدہی ٹی بلوچستان نا معدنی وسیلہ غاتا شونداری نابابت باندات آتیا گپ و تران کننگا، وزیراعلیٰ داوخت آ پارے کہ صوبائی حکومت 18 می آئینی ترمیم نا رداٹ معدنی وسیلہ غاتا پٹنگ و شونداری نا دوئی تینا واکداری تے کاریم اٹ اتسا بلوچستان منرل پالیسی اس درستی راستی کرفینے وخت اس کہ دا بشخ اٹی زرکاری نا دوئی کننگ کن جامع پالیسی اس ہم جوڑ کننگانے ، اوپارے کہ نن تینا معدنی وسیلہ غاتے شون ترسا اوفتے بلوچستان و داجاگہ نا الس نا راجی آسراتی و شونہالی کن کاریم اٹ اتنگ خوانہ ، اینخو مالی سال انا بجٹ اٹی معدنیات نا بشخ انا شونداری کن بھلو فنڈ اس جتا کننگانے ۔ معدنی وسیلہ تخوک علاقہ غاتا معلومداری تیا تالان جیوڈیٹا سینٹر اس جوڑ کننگانے و معدنی کوڑی تیا خلوک رائیلٹی و ریونیو ٹی ودکی کن گام گیج ہم کننگانے ۔ وزیراعظم نا سلاہکار معدنی بشخ انا شونداری کن صوبائی حکومت نا گام گیج آتا ستاءِ کرسا بنجائی حکومت نا ہروڑنا کمکاری باوری کرفینے ۔
