کوئٹہ۔ 21 فروری (اے پی پی) صوبائی سیکرٹری تعلیم شان الحق پارینے کہ صوبائی حکومت تعلیمی ادارہ غاتا اڈرتننگ، ساڑی تعلیمی ادارہ غاتیٹی المی آسودہی نا فراوانی و تعلیم نا معیار نا گچینی کن چندی ڈٹ آتیا عملدرآمد نا بنائِ کرینے و دامسخت کن تعلیمی بجٹ اٹی کیہی گناودکی کرسا مچ آ صوبہ ٹی تعلیمی ایمرجنسی نافذ کرینے۔ صوبائی حکومت اولیکو دے آن تعلیم ئِ اولیتی بنداو تیا مون آ دننگ کن ڈٹ بندی نا رداٹ تعلیمی بجٹ 4درسد آن ودفسا 24 درسد اسکان سرکرے۔ اوپارے کہ تعلیمی بجٹ اٹی ودکی تون اوار اوار پرائمری اسکول آتے مڈل، و مڈل آتے ہائی اسکول نا درجہ تننگ، گرج انا رداٹ ہزار آتا کچ اٹی ودکی کلاس روم تا جوڑ جاڑ تون اوار اوار اسکول آتیٹی آسراتی نا ودکی نا کنڈآخصوصی چکار تخسا عملی گام گیج کننگانے۔ اوپارے کہ تدوک آ دے سیسا نا کنڈآن چیف سیکرٹری بلوچستان ئِ دیوان اٹی پاننگاکہ صوبہ ٹی 70 درسد نا خڑک اسکول بند ئُ۔ ولے دا حساب وکتاب حق انا برعکس ئِ و اوفتے ٹی ہچئُ راستکی اس اف۔ اوپارے کہ صوبہ ٹی 90 درسد آن زیات اسکول آک فعال ئُ۔ مچ آ صوبہ خاص کر مر مر انگا علاقہ غاتیٹی استاد آک تعلیمی خذمت آتے جوان وڑاٹ سرانجام تننگ ئُ۔ اوپارے کہ صوبہ ٹی بیرہ 5 آن 6درسد اسکول غیر فعال ئُ۔ ہرافتے پورو فعال کننگ کن ہڑدڑی بنداو تیا گام گیج کننگ انگ ئِ۔ سیکرٹری تعلیم مستی پارے کہ معیاری تعلیم نا فراوانی حکومت نا اولیت آتیٹی سرفہرست ئِ۔ پوسکن آ نسل ئِ پوسکن آ تعلیم آن آراستہ کننگ و وزیراعلیٰ بلوچستان نواب ثناءاللہ خان زہری نا خوانوک بلوچستان ناوژن ئِ عملی جامہ اس بیرفنگ کن جامع حکمت عملی نا رداٹ کاریم کننگ انگ ئِ۔
