چناتا زند ءِ بچفوک آ غذاتا درآمد آ خلوک آ پابندی ءِ چٹفنگ نا معاملہ ءِ کابینہ نا دیوان اٹی ہرفیوہ، بنجائی وزیر آبی وسیلہ فیصل واوڈا لمہ و باوہ غاتا کنڈآن خاص انگا غذا تا درآمد آ پابندی نا چٹفنگ نا بابت اپیل نا نوٹس ءِ ہلک

اسلام آباد ۔ 20 فروری (اے پی پی) بنجائی وزیر آبی وسیلہ فیصل واوڈا پارینے کہ خاص انگا پال، نت و برنج آ تالان غذا ک چناتا جان ءِ بچفنگ کن المی ءُ ، چناتا زند ءِ بچفوک آ غذا تا درآمد آ خلوک آ پابندی ءِ چٹفنگ نا معاملہ ءِ کابینہ نا دیوان اٹی ہرفیوہ ۔ داخیال آتا درشانی ءِ او لمہ و باوہ غاتا کنڈآن خاص انگا غذاتا درآمد آ پابندی نا چٹفنگ نا بابت اپیل نا نوٹس ءِ ہلسا کرینے ۔ اوپارے کہ ناجوڑی تا گواچی چناتا لمہ و باوہ غاتون رابطہ کرسا معلومداری دوئی کرینٹ ۔ فیصل واوڈا پارے کہ خاص انگا پال ، نت و برنج آ تالان غذاک چناتا جا ن ءِ بچفنگ کن المیءُ ۔ کابینہ دیوان اٹی دامعاملہ غا وزیراعظم آن خصوصی خواست کیوہ ۔ اوپارے کہ مچ آ ملک اٹی 56چنادا ناجوڑی نا گواچی ءُ ، لمہ و باوہ غاتا فریشانی ءِ ہرسا جان بچفوک آ غذا تا فراوانی نا کسر ءِ کشوئی مریک ۔ اوپارے کہ خاص انگا غذا تا ملپننگ آن داوخت اسکان کیہی چناک دم تسنو ۔ چناتا لمہ و باوہ غاتون زوت اوڑدہی کرسا پین گام گیج ہم ہرفیوہ، میٹا بولزم ڈس آرڈر نا گواچی چناتا لمہ و باوہ غاک وزیراعظم عمران خان آن خواست کرینو کہ دا ناجوڑی نا گواچی چناتے کن خاص غذاتا درآمد آ خلوک آ پابندی ءِ چٹفنگے، ناجوڑی نا درمان کن مچ آ ملک اٹی بیرہ 3 ڈاکٹر ز ءُ، چناک ہسپتال اٹی داخل ءُ اوفتے خاص انگا غذاتا گرج ءِ ، ہرادستیاب افس ۔