اسلام آباد ۔ 20 فروری (اے پی پی) وزیراعظم عمران خان چین نا صدر شی جن پنگ ءِ پنچ شنبے نادے آ ٹیل فون کرے و کرونا وائرس آن ودی مروک آ حالیت آتارداٹ چین نا سرکڑدہ و الس تون پاکستان نا کنڈآن پورو یکجہتی نا درشانی ءِ کرے ۔ وزیراعظم کرونا وائرس آن مروک آ نہادی جانی نسخان تیا چین نا صدر تون دلی ہڑزخواہی کرے و کرونا وائرس نا توننگ و مون ءِ توننگ کن چین نا کنڈآن کروک آ کوشست آتا ستاءِ کرے ۔ اوپارے کہ کرونا وائرس نا چٹفنگ کن کروک آ کوشست آتے ٹی پاکستان نا الس و حکومت چین اتون سلوک ءُ ۔ دا ناجوڑی نا توننگ کن چین نا وخت آ گچین و دوررس گام گیج آتے جہانی کہول آ امنا کننگانے ۔ وزیراعظم کرونا وائرس آن بچنگ کن چین نا الس نا کمک ءِ کننگ کن فیلڈ ہسپتال و ڈاکٹر آتا ٹیم اس چین آ گدریفنگ نا پاکستان نا پیش کش نا ہم درشانی ءِ کرے ۔ وزیراعظم دا ہیت آ پورو پت انا درشانی ءِ کرے کہ چینی قوم صدر شی جن پنگ نا بے مٹ سرکڑدہ ئی ٹی ساڑی حالیت آتے ٹی سوگو و فتح مند مرسا مون آ بریک ۔ وزیراعظم دا مشکل ساہت اٹی پاکستانی شاری تا خیال داری کن چین نا پکا عزم و خصوصی بست و بند آتا ہم ستاءِ کرے ۔ اویخین ظاہر کرے کہ چین ہموڑے پاکستانی شاری و طالب علم آتا خیالداری کن گچین ممکن گام گیج آتے برجاتخک ۔ چین نا صدر دانازرک وخت اٹی پاکستان نا کنڈآن چین نا مخ تفی آ منت واری ءِ ہرفے و پارے کہ چین کرونا وائرس تون مون تننگ کن گچین ، وخت آ پبی گام گیج کننگ ءِ ۔ او پارے کہ کوویڈ ۔ 19 نا برخلاف جاری الس نا جنگ اٹی سرسہب مرسا مون آ بریک ۔ او پارے کہ چین پاکستانی طالب علم آتون تینا تیانبار سلوک کننگ ءِ و اوفتا رکھ ، جان جوڑی ہروڑخیال ءِ تخک ۔ صدر شی جن پنگ پاکستان و چین نا نیام اٹ اقتصادی شریداری ءِ پوسکن آ بڑزی تیا دننگ کن چین نا عزم انا درشانی ءِ کرے و پارے کہ دا تعلقداری تے سوگو کننگ کن سی پیک اہم ثابت مریک ۔ وزیراعظم عمران خان و چین نا صدر تزویراتی کمکاری آ مبنی شریداری ءِ پین سوگو کننگ و پوسکن آ دور اٹی مشترکہ آخبت کن چین وپاکستان نا الس نا نیام اٹ خڑکی رابطہ غاتے مون آ دننگ کن رابطہ و بڑزکو کہول انا ڈل آتا دورہ غاتا چرجوئی ءِ برجاتخنگ نا عزم انا درشانی ءِ کرے ۔
