سبی۔ 19 فروری (اے پی پی) صدر مملکت ڈاکٹر عارف علوی پارینے کہ حکومت بلوچستان نا شونداری آ چکار کرینے، سی پیک و شونداری ڈٹ آتیان بلوچستان اٹی شونداری ناپوسکن آدور بناکرینے، حکومت، فوج و قوم اواری اٹ دہشت گردی ءِ چٹفینو، پاکستان پرامن ملک انا وڑاٹ مون آ بسنے، ملک ءِ چندی چیلنج آک مون تروک ءُ ولے جعلی خبر تا کمک اٹ مایوسی تالان کننگ انگ ءِ۔ داخیال آتا درشانی ءِ او چارشنبے نادے آ سبی میلہ نا بنائی دود آن تران کرسا کرے۔ صدر مملکت پارے کہ سبی میلہ تاریخی اہمیت تخک، حکومت بلوچستان نا شونداری آ پبی چکار کننگ ءِ، پاک چین اقتصادی راہداری آن بلوچستان اٹی شونداری نا پوسکن آ دور بناکننگ ءِ، گوادر بندرگاہ غا کاریم برجاءِ۔ اوپارے کہ چینی گڑاک دا واپاری کسر آن گدرینگسا سمندر اسکان کارہ۔ خصوصی اقتصادی زون نا جوڑ کننگ آن بلوچستان اٹی شونداری ٹی ترندی بریک، بلوچستان قدرتی وسیلہ غاتیان مالامال ءِ۔ اوپارے کہ بلوچستان نا رقبہ غٹ آن زیات ءِ وخت اس کہ دا مریس کرکی علاقہ اس ہم تخک۔ دا علاقہ ٹی فش فارمنگ ءِ مون آ درسا برآمد آتے ٹی ودکی کننگ مریک ہراڑآن ملکی زرگزران ہم سوگو مریک۔ صدر مملکت پارے کہ ہیٹ خوافنگ نبی تا سنت ءِ، ساہدار بافی ءِ مون آ درسا ذرائع آمدن اٹی ودکی کننگ مریک۔ اوپارے کہ نن چنکو ڈیم تفنگ آن بایدے چکار کین داڑآن ننے دیر انا کاختی نا مون ءِ توننگ اٹ کمک رسینگک، دیر انا کاختی نا سوب تہذیب آتے نقل مکانی کروئی تمک و خلقت دیر اناپٹنگ اٹ ایلو جاگہ غاتیا کارہ، ننے پائیدار بنداو تیا دیر انا ویل انا ایسر آ چکار کروئی مریک۔ اوپارے کہ حکومت، قوم و پاک فوج اواری اٹ ملک آن دہشت گردی ءِ چٹفینو، دہشت گردی نا منہ واقعہ غاتیان ظاہر مریک کہ دہشت گرد آک آخیریکو ساہ تے ہلنگ ءُ، پاکستان پرامن ملک اسے نا وڑاٹ مون آ بننگ ءِ ہراڑے پیشن نا ملک آتیان زرکاری بننگ ءِ۔ صدر مملکت ڈاکٹر عارف علوی پارے کہ پاکستان آچندی دود و کانفرنس آتے ٹی مچ آ دنیا غان خلقت بننگ ءُ، ملک انا شونداری نا عمل برجاسلک۔ جعلی خبر تیان مایوسی تالان کننگ انگ ءِ، ملک ءِ چندی چیلنج مون تروک ءِ ہرافتے ایسر کننگ کن ہروڑنا گام گیج کننگ اُن۔
