اسلام آباد۔ 19 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم نا اسمگلنگ نا برخلاف کریک ڈاؤن السی ریلیف کن بھلو گام اسے، قومی زرگزران ءِ ارب آ روپئی نسخان تروک آ اسمگلر آتا سرکوبی ءِ کننگ انگ ءِ، ناروا کٹیا کاری نا حوصلہ شکنی ءِ کننگک ہراڑآن الس ءِ جوان نہاد آ گڑاتا فراوانی فراوانی ءِ پک کننگ اٹ کمک رسینگک، بلوچستان اٹی بارڈر مارکیٹ آتا جوڑ کننگ نا پیش رفت نا رفتار ءِ ہم ترندکننگ نا پارت کننگانے۔ ڈاکٹر فردوس عاشق اعوان چارشنبے نادے آ تینا ٹویٹ اٹی پارے کہ اسمگلنگ نا توننگ کن بھلو کچ اسے آکارروائی نا فیصلہ وزیراعظم نا کانود آ عملدراری نا پکا عزم انا درشانی ءِ، داملکی زرگزران ءِ ارب آ روپئی نا نسخان تیان بچفنگ کن عملی ءُ گام اسے، کنوئی آ گڑاتا اسمگلنگ نہاد آتے ٹی ودکی و السی تکلیف آتے ودفنگ نا سوب مریک۔ اوپارے کہ ذخیرہ اندوزی شفاف زرگزران نا دشمن و الس نا استحصال ءِ ہرانا موکل تفنہ، وزیراعظم عمران خان نا ذخیرہ اندوزآتا برخلاف گام گیج ضرورت نا گڑاتا نہاد آتے استحکام اتینہ، وزیراعظم صوبائی حکومت آتیان خولم نا نہاد آتے ٹی کمتی کن سلاہ بٹنگانے، بجلی و گیس انا بابت مستین نا حکومت آتا فیصلہ غاتا بھاریم ءِ پاکستان نا الس تینا کوپہ غاتیا ہرفے، وزیراعظم پٹرول، ڈیزل و گیس انا نہاد آتے ٹی کمتی نا روڈ میپ اس جوڑ کننگ نا پارت کرینے۔ اوپارے کہ الس نا ڈکھ آتا مداوا و اوفتے کن ریلیف نا فراوانی ننا بنداوی نصب العین ءِ۔
